މިދިޔަ 4 އަހަރަކީ ދުނިޔޭގެ ތާރީހުގައިވެސް ދިމާނުވާ ފަދަ ބޮޑެތި ގޮންޖެހުންތަކާއެކު ވެސް ސަރުކާރުން ވެފައިވާ ވައުދުތައް ފުއްދަމުން ގެންދެވުނު 4 އަހަރު ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރަށް 4 އަހަރު ފުރުމާއި ގުޅިގެން، ރާއްޖެޓީވީއަށް ދެއްވި އިންޓަރވިއުއެއްގައި ފިނޭންސް މިނިސްޓަރ އިބްރާހިމް އަމީރު ވިދާޅުވީ އެންމެ އުނދަގޫ ދުވަސްތަކުގައި ވެސް ސަރުކާރުން މަސައްކަތް ކުރެއްވީ އިގްތިސާދީ ކާރިސާއިން އަރައިގަނެ، ރާއްޖެ ހަމަ މަގަށް އެޅުމަށް މަސައްކަތް ކުރެވުނު 4 އަހަރު ކަމަށެވެ. މީގެ އިތުރުން ސަރުކާރުން އަންނަނީ ދިމާވާ ކޮންމެ ގޮންޖެހުމެއް ވެސް ގިރާކުރައްވަމުން ކަމަށް މިނިސްޓަރ އަމީރު ވިދާޅުވިއެވެ.

މިނިސްޓަރ އަމީރު ވިދާޅުވީ ރައީސް ސޯލިހުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ގާތްގަނޑަކަށް ހުރިހާކަމެއް ހެން، މިހާރު ވެސް ކުރިއަށް ގެންދެވޭ ކަމަށާއި، ހއ. އަތޮޅުން ފެށިގެން ސ. އަތޮޅާއި ހަމައަށް ހުރި ހުރިހާ ރަށްތަކެއްގައި ވެސް ޕަބްލިކް ސެކްޓަރ ޕްރޮޖެކްޓްތައް ކުރިއަށް ގެންދެވޭ ކަމަށެވެ.

މިނިސްޓަރ އަމީރު ވިދާޅުވީ ސަރުކާރު ވެރިކަމާއި ހަވާލުވި ފަހުންވެސް ހިންދެމިލައިގެން މަސައްކަތް ކުރެވޭނެ ޖާގައެއް ނުލިބޭ ކަމަށެވެ. ފުރަތަމަ އަހަރު ސަރުކާރުގެ ވިސްނުމާއެކު މަސައްކަތް ފެށުމަށް ތައްޔާރުވި ނަމަވެސް، ޖެހިގެން އައި 2020 ވަނަ އަހަރު ކޮވިޑް-19 ގެ ހާލަތާއި ބައްދަލުކުރަން ޖެހުނު ކަމަށާއި، 2021 ވަނަ އަހަރު އެކަމުން އަރައިގަނެވޭނެކަމަށް އުއްމީދުކުރި ނަމަވެސް 2022 ވަނަ އަހަރު ހަނގުރާމައާއި ކުރިމަތިލާން ޖެހުނު ކަމަށެވެ.

ނަމަވެސް ސަރުކާރުން މަސައްކަތް ކުރަނީ މި ދަނޑިވަޅުގައި ވެސް ރައްޔިތުންގެ މަންފާއަށްޓަކައި ކަމަށާއި، ކޮވިޑްގެ ތެރޭގައި ރައްޔިތުން ބިކަވިޔަނުދީ ސަރުކާރުން މަސައްކަތްކޮށްފައިވާނެ ކަމަށެވެ.