2018 ވަނަ އަހަރުގެ އޯގަސްޓު މަހު އޭރުގެ ރައީސް އަބްދުﷲ ޔާމީން ރ އަތޮޅު ދުވާފަރުގައި ބައިވެރިވެވަޑައިގެންނެވި ޖަލްސާއެކެވެ. ވާހަކަފުޅު ދައްކަވަމުން އެމަނިކުފާނު ވަނީ، އެމަނިކުފާނު އިންނަވާ ޖަލްސާތަކުގައި ވާހަކަފުޅު ދައްކަވާ އެއްވެސް މީހަކު ރައީސް މައުމޫނަށް އިހާނެތި ބަހެއް ނުބުނުމަށާއި ރައީސް މައުމޫނުގެ ހިދުމަތުގައި ކޫރުމެއް އެޅޭ ފަދަ ބަހެއް ވެސް ނުބުނުމަށް އެދިވަޑައިގެންފައެވެ.

އެހެން ވިދާޅުވީ ވެސް ކީއްވެތޯއެވެ؟ ރައީސް ޔާމީންގެ އެއްބަފާ ބޭބޭފުޅު މައުމޫނަށް ރާއްޖެ ތަރައްގީ ނުކުރެއްވުނު ކަމަށް އެ ޖަލްސާގައި އެންވަޔަރަމެންޓް މިނިސްޓަރު ތާރިގު ދެއްކެވި ވާހަކަތަކަކަށް އިޝާރާތް ކުރައްވައެވެ.

ރައީސް މައުމޫނަކީ ރާއްޖެ ތަރައްގީ ކުރެއްވި ބޭފުޅެއް ކަމަށާއި، ރައީސް މައުމޫނަކީ ދުވާފަރު ވެސް ތަރައްގީ ކުރެއްވި ބާނީ ކަމަށް އެ ދުވަހު ރައީސް ޔާމީން ވިދާޅުވިއެވެ.

ރައީސް މައުމޫނަކީ އިގްތިސާދީ ކުރިއެރުން ވެސް އަދި އިޖުމާއީ ހަމަޖެހުން ވެސް އަދި ތައުލީމީ ދާއިރާ ވެސް ދިވެހިން ހީނުކުރާ ހިސާބަށް ކުރިއަށްގެންގޮސް ދެއްވި ބޭފުޅެއްކަމަށް އެ ދުވަހު ވިދާޅުވިއެވެ.

އެހެންނަމަވެސް، މިއަދު އެމަނިކުފާނުގެ އަޑާއި ރާގު ވަނީ ވަރަށް ވެސް ބޮޑަށް ބަދަލުވެފައެވެ. ރިޔާސީ އިންތިޚާބުގެ ކެމްޕޭނަށް އައްޑޫއަށް ކުރައްވަމުން ގެންދަވާ ދަތުރުފުޅުގެ ތެރެއިން އާންމުންގެ ބަޔަކާ ވާހަކަފުޅު ދައްކަވަމުން، މައުމޫނުގެ ނަން އިވިވަޑައިގަތުމުން ރައީސް ޔާމީނަށް އެއޮއް ވީ ގޮތެކެވެ.

ރައީސް މައުމޫނުގެ ވެރިކަމުގެ 30 އަހަރުގެ ވާހަކަ މިއަދު އެ ދެއްކެވީ މަލާމާތާއި ފޫހިކަމުގެ ރާގެއްގައެވެ. 30 އަހަރުވެގެން ދިޔައިރު ރައްޔިތުންނަށް ޚިދުމަތެއް "ޑެލިވަރ ކޮށްލެވިފައި ނެތް" ކަމަށް ވެސް ރައީސް ޔާމީނު ވިދާޅުވިއެވެ.

އެއްވެ ތިބި މީހުންނާ ވާހަކަފުޅު ދައްކަވަމުން ރައީސް ޔާމީނު ވަނީ އެތަނުގައި ހުރި މީހެއްގެ ގާތުގައި އޭނާއަށް ކިޔަނީ ކޮން ނަމެއްތޯ އައްސަވާފައެވެ. ޖަވާބުގައި އޭނާއަށް ކިޔަނީ މައުމޫނޭ ދެންނެވުމުން، ރައީސް ޔާމީނުގެ މޫނުފުޅުގެ ކުލަވަރުވެސް މުޅިން ބަދަލުވެގެން ދިޔައެވެ. އެއްބަފާ ބޭބޭފުޅާ މެދު ހިތުގައި އޮތް އަސްލު ޝުއޫރުތައް ބޭރުކޮށްލެއްވީ އެތަނުގައި ހުރި މައުމޫނު ނަމަކަށް ކިޔާ އާންމުންގެ މީހަކަށެވެ. ބަސްމަގުވެސް ހުރީ ނިކަން ޒާތެއްގެ ގޮތަކަށެވެ.

ވިދާޅުވަމުން ގެންދެވީ ރައީސް މައުމޫނަށް ޚިދުމަތް ކޮށްދެވިފައި ނެތް ވާހަކައެވެ. 30 އަހަރު ވެރިކަމަށް ލިބިވަޑައިގަތުމުން ވެސް ވީކަމެއް ނެތް ކަމުގެ ވާހަކައެވެ.

އެހެންވެސް ވެދާނެއެވެ. އޭރު ހުންނެވީ ވެރިކަމުގައެވެ. ބޭބޭފުޅު އޭރު ހުންނެވީ ހައްޔަރުކޮށް، އެމަނިކުފާނުގެ ސަރުކާރުން ފެބްރުއަރީ 5 ވަނަ ދުވަހު ކުއްލި ނުރައްކަލުގެ ހާލަތު އިއުލާނު ކުރިއިރު، ފޯނު ނުދެއްވި ކަމަށް ބުނެ އަދުލު އިންސާފަށް ހުރަސްއެޅިކަން ސާބިތުވެ، އެއް އަހަރާއި ހަތް މަހުގެ ޖަލު ހުކުމެއްގައެވެ.

އެހެންނަމަވެސް މިއަދު ރައީސް މައުމޫނަކީ މި ހިނގަމުންދާ ސަރުކާރު ކޯލިޝަންގެ މުހިއްމު ޕާޓްނަރެކެވެ. ކުރިއަށް އޮތީ ރިޔާސީ އިންތިޚާބެވެ. ރައީސް ޔާމީނު އެ ގެންދަވަނީ އިންތިޚާބަށް ކެމްޕޭން ކުރައްވަމުންނެވެ. ވީއިރު އޭރު ދެއްކެވި ވާހަކަފުޅު މިހާރު ދިމާނުވުން ވެސް އެކަށީގެންވެއެވެ. އެހެންނަމަވެސް މައުމޫނުގެ ނަންފުޅު އިވިވަޑައިގަތުމާ އެކު، ރައީސް ޔާމީނަށް އެ ވެގެންދިޔަ ގޮތެއް ދެއްތޯއެވެ.