ފުޓުބޯޅައިގެ މަތީ ފަންތީގެ ކުލަބުތަކަށް ބޭނުންވަނީ ސްޕެއިންގެ ޖެރާޑް ޕީކޭ ދެއްކި ފަދަ ކުޅުން ކުޅޭނެ ކުޅުންތެރިން ކަމަށް ޕެޕް ގާޑިއޯލާ ބުނެފިއެވެ.
ޕްރިމިއާ ލީގުގެ މެންޗެސްޓަރ ސިޓީގެ ކޯޗު ގާޑިއޯލާ މިހެން ބުނީ ފުޓުބޯޅަ އިން ރިޓަޔާވާކަން ޕީކޭ އިއުލާންކުރުމާ ގުޅިގެންނެވެ. ގާޑިއޯލާ ބުނީ ފުޓުބޯޅަ ކުޅުން ހުއްޓާލާނެ ކަން ޕީކޭ އިއުލާން ކުރުން ވެގެންދިޔައީ އޭނާ އަށް ހައިރާންކަމެއް ލިބުނު ޚަބަރެއް ކަމަށެވެ. ގާޑިއޯލާ ބުނީ ޕީކޭ އޭނާގެ ޒުވާން ދުވަސްވަރު އިނގިރޭސި ޕްރިމިއާ ލީގުގައި ހުނަރުވެރި ކުޅުމެއް ދެއްކި ކަމަށެވެ. އަދި އެއަށްފަހު ސްޕެއިންގެ ބާސެލޯނާ އަށް ބަދަލުވެ އޭނާ ދެއްކީ ވަރަށް އާދަޔާ ޚިލާފު ކުޅުމެއް ކަމަށް ވެސް ގާޑިއޯލާ ބުންޏެވެ.
މީގެ އިތުރުން ގާޑިއޯލާ ބުނީ އޭނާ އެދެނީ މުސްތަޤުބަލުގައި ޕީކޭ އަބަދު ވެސް ހެޔޮ ގޮތްތަކެއް ވުމަށް ކަމަށެވެ. އޭނާ ފާހަގަ ކުރި ގޮތުގައި ޕީކޭ އަކީ ބޮޑެތި މެޗުތަކަށް ޖެހިލުންނުވާ، ވަރުގަދަ ކުޅުންތެރިޔެކެވެ. ޕީކޭ ކުޅުމުގައި އެއްވެސް ކަމަކުން ކައްސާނުލާނެ ކަން ފާހަގަ ކުރަމުން ގާޑިއޯލާ ބުނީ ޕީކޭ އަކީ ބޮޑެތި ކުލަބުތަކުން ބޭނުންވާ ކުޅުން ދެއްކި ކުޅުންތެރިޔެއް ކަމަށެވެ. އިތުރަށް އޭނާ ބުނީ ޕީކޭގެ މުސްތަޤުބަލު އުޖާލާ ވާނެ ކަމަށާއި، ކޯޗެއްގެ ގޮތުގައި ޕީކޭ އަށް އިރުޝާދު ދިނުމަކީ އޭނާ އަށް ލިބޭ އުފަލެއް ކަމަށެވެ.
ޕީކޭގެ ފަހު މެޗަކަށް ވާނީ ހޮނިހިރު ދުވަހުގެ ރޭ ސްޕެނިޝް ލީގުގައި ބާސެލޯނާ އިން އެ ޓީމުގެ އަމިއްލަ ދަނޑުގައި ކުޅޭ މެޗެވެ. އެއީ ބާސެލޯނާގެ ޖާޒީގައި ޕީކޭ ކުޅޭނެ 616 ވަނަ މެޗެވެ.
