ބާސެލޯނާގެ ކުޅުންތެރިންނަކީ ފަޚުރުވެރި ބައެއްކަން ދައްކައިދޭން ޖެހޭ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ޒަވީ މިހެން ބުނީ ޔުއެފާ ޗެމްޕިއަންސް ލީގު ގްރޫޕް ސްޓޭޖުގެ ފަހު މެޗުގައި ބުދަ ދުވަހުގެ ރޭ ވިކްޓޯރިއާ ޕްލެޒެންއާ ދެކޮޅަށް ނުކުންނަ މެޗުގެ ކުރިންނެވެ. އެ މެޗަށް ނުކުންނައިރު ވެސް ބާސެލޯނާ ވަނީ މުބާރާތުން ކަޓައިފައެވެ. ޗެމްޕިއަންސް ލީގުގައި ކުޅުނު ފަސް މެޗުގެ ތެރެއިން ބާސެލޯނާ މޮޅުވީ އެންމެ މެޗަކުންނެވެ. އެއީ ޕްލެޒެންއާ ދެކޮޅަށް އަމިއްލަ ދަނޑުގައެވެ. އެއް މެޗު އެއްވަރުވީއިރު، ތިން މެޗުން ވަނީ ބަލިވެފައެވެ.

ޕްލެޒެން މެޗުގެ ކުރިން ޒަވީ ބުނީ ހާލަތު ކޮންމެ ގޮތަކަށް އޮތް ނަމަވެސް ކުޅުންތެރިންނަކީ ބާސެލޯނާގެ ކުޅުންތެރިން ކަމަށެވެ. އަދި އެ ކުޅުންތެރިން ތިބީ ދުނިޔޭގައި އޮތް އެންމެ މޮޅު އެއް ކުލަބުގައި ކަމަށް ޒަވީ ވަނީ ބުނެފައެވެ. މީގެ އިތުރުން ޒަވީ ބުނީ ބާސެލޯނާ އަށް ޗެމްޕިއަންސް ލީގުން ޖާގަ ބޭނުންވާކަން ކުޅުންތެރިން ދައްކައިދޭން ޖެހޭނެ ކަމަށެވެ. އިތުރަށް އޭނާ ބުނީ ބާސެލޯނާ މިހާރު އޮތީ އުންމީދު ކުރި ޙާލަތެއްގައި ނޫން ކަމަށާއި، ނަމަވެސް ކުޅުންތެރިން އެ މީހުންނަކީ ބާސެލޯނާގެ ފަޚުރުވެރި ބައެއްކަން ދައްކައިދޭން ޖެހޭނެ ކަމަށެވެ.

ޗެމްޕިއަންސް ލީގުން ބާސެލޯނާ ކެޓުގާއި، ސްޕެނިޝް ލީގުގައި ވާދަވެރި ރެއާލް މެޑްރިޑު އަތުން ބަލިވުމުން ޒަވީގެ ކުރިމަގާ މެދު ސުވާލު އުފެދުނެވެ. ނަމަވެސް ބާސެލޯނާ އިން ވަނީ ޒަވީ އަށް އިތުބާރުކޮށް، އޭނާ އަށް ހަވާލު ކުރި މަސައްކަތާއިގެ ކުރިއަށްދާން ކުލަބުން ބޭނުންވާކަން ހާމަކޮށްފައެވެ.

ބާސެލޯނާ އާއި ޕްލެޒެން ބައްދަލުކުރާ މެޗު އޮންނާނީ ބުދަ ދުވަހުގެ ރޭ ރާއްޖެ ގަޑިން 1 ޖަހާއިރުއެވެ.