ސެޕްޓެމްބަރ މަހުގެ 13ން ފެށިގެން ކުރިޔަށްގެންދިޔަ މިއަހަރުގެ ބޯ ހިމެނުމުގައި މިހާތަނަށް ގުނިފައިވާ އަދަދުތަކަށް ބަލާއިރު ރާއްޖޭގައި ދިރިއުޅޭ އާބާދީ އަކީ 452،495 ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފިއެވެ.

އެއިދާރާއިން ވަނީ އޮކްޓޯބަރު މަހުގެ 20 ވަނަ ދުވަހުގެ ނިޔަލަށް ގުނި އަދަދުތަކުގެ ތަފާސްހިސާބު ހާމަކޮށްފައެވެ. މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނީ މިހާތަނަށް ގުނިފައިވާ އާބާދީއަކީ އިދާރީ ރިކޯޑުތަކުން ބަލާއިރު ރާއްޖޭގެ ރަޖިސްޓާޑް އާބާދީގެ 89 އިންސައްތަކަމަށެވެ. ރަޖިސްޓާޑް އާބާދީގެ ތެރޭގައި ރާއްޖެއިން ބޭރުގައި ދިރިއުޅޭ ދިވެހިން ވެސް ހިމެނޭކަމަށް އެއިދާރާއިން ބުނެއެވެ.

ހާމަކޮށްފައިވާ ތަފާސްހިސާބުތަކަށް ބަލާއިރު ރާއްޖޭގައި ދިރިއުޅެނީ 355،331 ދިވެހިންނާއި 97،164 ބިދޭސީންނެވެ. އެންމެފަހުން ބޯހިމަނާފައިވާ 2014 ވަނަ އަހަރުގެ ތަފާސްހިސާބުތަކަށް ބަލާއިރު އޭރު ރާއްޖޭގައި ދިރިއުޅޭ އާބާދީކަމަށް ރިކޯޑު ކުރެވިފައިވަނީ 402،071 މީހުންނެވެ. އެއީ 338،434 ދިވެހިންނާއި 63،637 ބިދޭސީންނެވެ.

އެހެންކަމުން ފާއިތުވި އަށް އަހަރުގެ ތެރޭގައި އިތުރުވެފައިވަނީ 16،897 ދިވެހިންނާއި 33،527 ބިދޭސީންނާއެކު ޖުމްލަ 50،424 މީހުންނެވެ. މިއީ އަދި ވަގުތީ އަދަދުތަކަކަށް ވުމުން މިއަދަދުތަކަށް ބަދަލުއައުމަކީ އެކަށީގެންވާކަމެކެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފައިވާ ގޮތުގައި ބިދޭސީންގެ ގޮތުގައި ގުނާފައިވާ 97،164 މީހުންނަކީ އިމިގްރޭޝަންގެ ރިކޯޑްތަކުން ދައްކާ ބިދޭސީންގެ އާބާދީގެ 65 އިންސައްތައެވެ. އެހެންކަމުން މިއަދަދު އިތުރަށް ފުރިހަމަކުރުމަށްޓަކައި ވަޒީފާތަކަށް ބިދޭސީން ގެނެސްފައިވާ އެމްޕްލޯޔަރުންނާއި ގުޅިގެން ބިއުރޯއިން ދަނީ އިތުރު މަސައްކަތްތަކެއް ކުރަމުންނެވެ.

މީގެއިތުރުން ވެސް ތަޅުލާފައިވާ ތަންތަނާއި ބޯހިމެނިފައިނުވާ ފަރާތަކާއި ބިއުރޯގެ ފަރާތުން ގުޅުމުން ނުވަތަ ޒިޔާރަތްކުރުމުން ދޭ އެއްބާރުލުމަށް ރިއާޔަތްކޮށް، ބޯހިމެނުމުގެ މައުލޫމާތު ފުރިހަމަ ކުރުމަށް މިވަގުތު އެންމެ އެކަށީގެންވާ ގޮތަކީ އެފަރާތްތަކާއި ގުޅައިގެން މަޢުލޫމާތު ލިބެމުންދާ މިންވަރަކުން މައުލޫމާތު ނަގަމުން ގެންދިއުންކަމަށް އާބާދީ އާ ގުޅޭ ތަފާސްހިސާބުގެ މާހިރުން ލަފާދެއްވާފައިވާތީ، މިހާރުން ފެށިގެން ނޮވެންބަރު މަހުގެ 10 ގެ ނިޔަލަށް ޕޯސްޓް އެނިއުމަރޭޝަން ކޮލިޓީ ވަޒަންކުރުމަށް ސަރވޭއެއް ވެސް ބިއުރޯގެ ފަރާތުން ކުރިއަށްގެންދާނެކަމަށް ބިއުރޯއިން ބުނެއެވެ. މިއީ ޔޫ.އެން.އެފް.ޕީ އޭގެ ސަޕޯޓާއެކު ކުރެވޭ މަސައްކަތެކެވެ.

ބޯހިމެނުން ފުރިހަމަވާނީ ހުރިހާ ފަރުދުން ހިމެނިގެންކަމުން ބޯހިމެނުމުގައި ކޮންމެ ފަރުދަކު ވެސް ހިމެނުނުކަން ޔަޤީންކުރުމަށް ބިއުރޯއިން އެދެއެވެ. އެހެންކަމުން މިހާތަނަށް ބޯހިމެނިފައިނުވާ ގޭބިސީތަކުން ބިއުރޯގެ ހޮޓްލައިން 1423 ނުވަތަ 3008400 އަށް ގުޅާ ނުވަތަ ވެބްސައިޓުގައިވާ ފޯމު ފުރިހަމަ ކުރުމަށް ވަނީ އެދިފައެވެ.