ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ހާއްސަ ސިޓީފުޅެއް އޮމާންގެ ރަސްގެފާން ހައިތަމް ބިން ތޯރިގަށް ރައްދުކުރެއްވުމަށްޓަކައި އެގައުމުގެ ހާރިޖީ ވަޒީރު ސައްޔިދު ބަދުރު އަލްބުސައިދީއާ ހަވާލުކުރައްވައިފި އެވެ.
މިސިޓީފުޅު އޮމާންގެ ފޮރިން މިނިސްޓަރާ ހަވާލުކުރެއްވި ރައީސްގެ ހާއްސަ މަންދޫބެއްގެ ގޮތުގައި މިހާރު އޮމާނަށް ވަޑައިގެން އުޅުއްވާ ރާއްޖޭގެ ފޮރިން މިނިސްޓަރު އަބްދުﷲ ޝާހިދު އެެވެ. އޮމާންގެ ވެރިރަށް މަސްކަޓުގައި މިނިސްޓަރު ޝާހިދު ވަނީ އެ ގައުމުގެ ފޮރިން މިނިސްޓަރު ސައްޔިދު ބަދުރާ ބައްދަލުކުރައްވާ ރަސްމީ މަޝްވަރާތަކެއް ކުރައްވާފައެވެ. ރައީސްގެ ސިޓީފުޅު ހަވާލުކުރެއްވެވީ މިބައްދަލުކުރެއްވުމުގައެވެ.
މިނިސްޓަރު ޝާހިދު ވިދާޅުވީ މިބައްދަލުވުމުގައި ދެ ގައުމުގެ ދެމެދުގައި އިތުރަށް ގުޅުން ބަދަހިކުރުމަށް މަޝްވަރާ ކުރެއްވެވި ކަމަށެވެ. އަދި މިމަޝްވަރާތަކުގެ ތެރެއިން ދެ ގައުމުގެ ގުޅުން އިތުރު ދާއިރާތަކުން ބަދަހިކުރެވޭނެ ކަމުގެ ޔަގީންކަން އެބައޮތް ކަމަށެވެ. މިނިސްޓަރު ޝާހިދު ވަނީ އޮމާންގެ މިނިސްޓާ އޮފް ހެރިޓޭޖް އެންޑް ޓޫރިޒަމް ސާލިމް ބިން މުހައްމަދު އަލްމަހްރޫގީއާ އެ ގައުމުގެ އިންވެސްޓްމަންޓް އޮތޯރިޓީގެ އިސްވެރިންނާ ވެސް ބައްދަލުކުރައްވާފައެވެ.
މިބައްދަލުކުރެއްވުންތަކުގައި ފަތުރުވެރިކަމާއި އިންވެސްޓްމަންޓްގެ ދާއިރާއިން ގުޅުން ބަދަހިކުރެެއްވުމަށް މަޝްވަރާކުރައްވާފައިވެއެވެ.
