އިސްލާމިކް ސްޓޭޓް އިން އިރާގު އެންޑް ސީރިއާ ގެ ނަމުން އާއްމުވެފައިވާ އައިސިސް ޖަމާއަތުން އިރާގުގެ މޫސަލްގައި ހުންނަ ތާރީޚީ އަދި މަޝްހޫރު އަލް ނޫރީ މިސްކިތް ގޮއްވާލައިފިއެވެ.
#ISIS blows up the historic Great Mosque of al-Nuri and its leaning minaret which gave #Mosul its nickname "the hunchback" - Iraqi Military pic.twitter.com/STRUxydc0H
— Zaid Benjamin (@zaidbenjamin) June 21, 2017
އަލް ނޫރީ މިސްކިތް ގޮއްވާލިކަން އިރާގުގެ މިލިޓަރީން ކަށަވަރު ކޮށްދީފައިވާ ކަމަށް ބައިނަލް އަގްވާމީ މީޑިއާތަކުން ވަނީ ޚަބަރު ދީފައެވެ.
މިސްކިތް ގޮއްވާލީ ޖޫން މަހުގެ 21 ވީ ބުދަ ދުވަހުގެ ރޭގެ ވަގުތެއްގައި ކަމަށް ޚަބަރު ތައް ބުނެއެވެ.
މިއީ 12 ވަނަ ގަރުނުގައި ބިނާކޮށްފައިވާ ތާރީޚީ މިސްކިތެކެވެ. އަދި އިރާގުގެ އެންމެ މަޝްހޫރު އެއް މިސްކިތްވެސް މެއެވެ. މިސްކިތުގެ މުންނާރުގެ އުސް ކަމާއި މުންނާރު އެއްފަރާތައް އަރިއަޅާލައި ހުންނަ ހުރުމުގެ ސަބަބުން އެ މިސްކިތް ބަލާލަންވެސް ގިނަ ބަޔަކު ޒިޔާރަތް ކުރެއެވެ.
Al-Nuri mosque, historical landmark of #Mosul built at the 12th century, where Baghdadi declared himself caliph, was blown up by IS tonight. pic.twitter.com/EAFXxHlVoa
— Nicolas Henin (@N_Henin) June 21, 2017
އައިސިސްގެ ލީޑަރު އަބޫބަކުރު އަލް ބަގްދާދީ 2014 ވަނަ އަހަރުގެ ޖޫން މަހު އޭނާގެ އިސްލާމީ ޚިލާފަތު އިއުލާން ކުރީ މި މިސްކިތުގައެވެ.
އަލް ނޫރީ މިސްކިތަކީ މީގެ ކުރިންވެސް އައިސިސް އިން ގޮއްވާލުމަށް ޓާގެޓް ކުރި މިސްކިތެކެވެ. މިސްކިތް މިހާތަނަށް ރާއްކާތެރި ކުރަމުން ދިޔައީ މޫސަލްގެ އާއްމު ރައްޔިތުން އިންސާނީ އައްޑަނައެއްގެ ގޮތުގައި މިސްކިތުގެ ހިމާޔަތުގައި ތިބެގެންނެވެ.
އައިސިސް ޖަމާޢަތުން މީގެ ކުރިންވެސް ތާރީޚީ އަދި ސަގާފީ ގޮތުން ދުނިޔޭގެ ފެންވަރުގައި ފާހަގަ ކުރެވޭ އެތައް ތަނެއް ހަލާކު ކޮށްފައިވާކަން ފާހަގަ ކުރެވެއެވެ. މިގޮތުން ސީރިއާގެ ގަދީމީ ސަހަރެއް ކަމަށްވާ ޕަލްމީރާ އައިސިސް އިން ވަނީ ފުނޑުފުނޑު ކޮށްފައެވެ.
މިހާދިސާ ހިނގީ އިރާގުގެ ސަރުކާރު ސިފައިންނާއި އެމެރިކާގެ ފައުޖުތައް ގުޅިގެން އައިސިސް އާ ދެކޮޅަށް ކުރަމުންދާ ހަނގުރާމައިގައި އައިސިސްގެ ބާރު ކުޑަވަމުންދާ ކަމަށް ބައިނަލް އަގްވާމީ މީޑިއާއިން ހާމަ ކުރަމުންދާ ދަނޑިވަޅެއްގައި ކަން ފާހަގަ ކުރެވިފައެވެ.
އައިސިސްގެ ބަޔާންތައް ޝާއިއު ކުރާ އަލް އަމަގް ވެބްސައިޓްގައި އައިސިސް އިން ނެރެފައިވާ ބަޔާނެއްގައި ބުނެފައިވަނީ މިސްކިތް ގޮއްވާލީ އެމެރިކާއިން ދިން ހަމަލާއެއްގައި ކަމަށެވެ.
