ފުޓުބޯޅަ ކުޅުމުން ރިޓަޔަރ ކުރުމަށްފަހު ކޯޗިންގެ ދާއިރާ އަށް ދާން ބޭނުންނުވާ ކަމަށް އާޖެންޓީނާގެ ކެޕްޓަން ލިއޮނެލް މެސީ ބުނެފިއެވެ.
މެސީ މިހެން ބުނީ ދާދި ފަހުން އާޖެންޓީނާގެ ނޫސްވެރިޔަކަށް އޭނާ ދިން އިންޓަވިޔުއެއްގައެވެ. ކުރިމަގާ ގުޅޭ ގޮތުން ވާހަކަ ދައްކަމުން މެސީ ބުނީ ފުޓުބޯޅަ ކެރިއަރު ނިންމާލުމަށްފަހު، ކޯޗިންގެ ދާއިރާ އަށް ދާން އޭނާ ބޭނުންނުވާ ކަމަށެވެ. އޭނާ ބުނީ އެ ވާހަކަ ހަމަ އެގޮތަށް ޒިނެދިން ޒިދާން ވެސް ބުނި ކަމަށެވެ. ނަމަވެސް ފަހުން ޒިދާން ކޯޗަކަށްވިކަން ފާހަގަކޮށް މެސީ ބުނީ، ޒިދާން ވަނީ ކޯޗެއްގެ ގޮތުގައި ތިން ޗެމްޕިއަންސް ލީގު ވެސް ކާމިޔާބުކޮށްފައި ކަމަށެވެ.
މީގެ އިތުރުން މެސީ ބުނީ އޭނާ ބޭނުންވަނީ ކުލަބެއްގެ ސްޕޯޓިން ޑިރެކްޓަރަކަށްވާން ކަމަށެވެ. އެއީ ޓީމެއް ބިނާކޮށް، ކޯޗުންނަށް އެހީތެރިވެދޭން ކަން އޭނާ ވަނީ ފާހަގަކޮށްފައެވެ. ނަމަވެސް އެކަމާ މެދު މުޅިން އަދި ޔަގީން ނުވާ ކަމަށް ވެސް މެސީ ބުންޏެވެ.
މި އިންޓަވިޔުގައި މެސީ ބުނީ މިއަހަރު ޤަތަރުގައި އޮންނަ ވޯލްޑް ކަޕަކީ އޭނާ ފެންނާނެ އެންމެ ފަހު ވޯލްޑް ކަޕް ކަމަށެވެ. މެސީ ބުނި ގޮތުގައި އެ ނިންމުމަކީ މާ ކުރިން ވެސް އޭނާ ނިންމާފައި އޮތް ނިންމުމެއް ކަމަށެވެ.
ފުޓުބޯޅާގައި މެސީ ވަނީ ގިނަ ކާމިޔާބީތަކެއް ހޯދާފައެވެ. އާޖެންޓީނާއާއެކު އޭނާ ވަނީ 2021 ވަނަ އަހަރުގެ ކޮޕަރ އެމެރިކާ މުބާރާތް ކާމިޔާބުކޮށްފައެވެ. މީގެ އިތުރުން މިއަހަރު އޭނާ ވަނީ އާޖެންޓީނާއާއެކު ޔުއެފާ ކަޕް އޮފް ޗެމްޕިއަންސްވެސް ކާމިޔާބުކޮށްފައެވެ. މެސީ ވަނީ އިންޑިވިޖުއަލީ ވެސް އެތައް އެވޯޑުތަކެއް ހޯދާފައެވެ.
