ރާއްޖެ ވަކިވަކި ޖަޒީރާ ރަށްތަކެއްގެ ގޮތުގައި އޮތުމަކީ ތަރައްގީއަށް އޮތް ހުރަހެއް ނޫންކަމަށް، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އެމްޓީސީސީން ހޯރަފުށީގެ މަގުތަކުގައި ތާރުއެޅުމުގެ މަސައްކަތް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން އަސްލަމް ވިދާޅުވީ، ރާއްޖެ ވަކިވަކި ރަށްތަކެއްގެ ގޮތުގައި އޮތުމަކީ ތަރައްގީއަށް އޮތް ހުރަހެއް ނޫން ކަމަށާއި، އެ ތަރައްގީގެ މައިބަދައަކީ ފެރީގެ ނިޒާމުކަމަށެވެ.

ދުނިޔެ ތަރައްގީވެފައި އޮތަސް ރާއްޖެ ތަރައްގޚވަމުން ދިޔަ ސްޕީޑް ލަސްކަން ފާހަގަކުރައްވައި އަސްލަމް ވިދާޅުވީ، ފަހަކަށް އައިސް ތަރައްގީގެ ދުވެލި ބާރުވެއްޖެކަމަށެވެ. އަދި އޭގެ މައިގަނޑު ސަބަބަކީ ވާދަވެރި ސިޔާސީ ހަރަކާތްތައް ކަމަށް ވިދާޅުވިއެވެ.

އަސްލަމް ވިދާޅުވީ، މީގެ ކުރީގެ ވެރިކަމެއްގައި ވަރަށް ބޮޑަށް ފިކުރު ހުރީ 70 އިންސައްތަ މީހުން މާލެ ސަރަހައްދަށް ޖަމާކުރުމަށްކަމަށެވެ. ނަމަވެސް މި ސަރުކާރުގެ ވިސްނުމަކީ އެއީ ނޫންކަމަށާއި، އެމީހެއްގެ އުފަން ރަށުގައި ދިރިއުޅެން ކޮންމެ މީހަކުވެސް ލޯބިކުރާނެކަމަށެވެ. އަސްލަމް އިތުރަށް ވިދާޅުވީ އަސާސީ ތައުލީމަށްފަހު ރާއްޖެއަށް އަންނާނެ އެންމެ ބޮޑު ބަދަލަކީ ދަތުރުފަތުރުގެ ނިޒާމުކަމަށެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވެރިކަން "ބާރަށް ތަރައްގީ ކުރިއަށްދިޔަ" ޒަމާނުގެގޮތުގައި ތާރީޚުގައި ލިޔެވިގެންދާނެކަމަށް އަސްލަމް ވަނީ ވިދާޅުވެފައެވެ. އެމަނިކުފާނު މިހެން ވިދާޅުވީ ހދ. ނައިވާދޫގެ ފެނުގެ ނިޒާމުގެ މަސައްކަތް ނިންމައި، ޚިދުމަތް ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

އަސްލަމް ވިދާޅުވީ، އެހެން ސަރުކާރުތަކާ މި ސަރުކާރު ތަފާތުވާނެކަމަށެވެ. އެގޮތުން، މި ސަރުކާރުން ގިނަ އަދަދެއްގެ މަޝްރޫއުތައް ހިންގަމުންދާއިރު، ރައީސް ވަޑައިގަންނަވަން ޖެހިވަޑައިގަންނަވާނީ ހަމައެކަނި މަޝްރޫއުތައް ނިންމުން ފާހަގަކުރެއްވުމަށް ކަމަށެވެ.

މި ސަރުކާރުން ފެށި މަގު ހެދުމުގެ މަސައްކަތްތަކުގެ ތެރެއިން 5 ރަށެއްގެ މަސައްކަތް މިހާތަނަށް ނިންމާލާފައިވާއިރު، އިތުރު 21 ރަށުގެ މަސައްކަތް މިހާރުވެސް ކުރިއަށްދާކަން އަސްލަމް ފާހަގަކުރެއްވިއެވެ. އަދި 7 ރަށެއްގެ ބިން ހިއްކުމުގެ މަސައްކަތް ނިމިފައިވާއިރު، އިތުރު 7 ރަށުގެ ބިން ހިއްކުމުގެ މަސައްކަތް ކުރިއަށްދާ ކަމަށާއި، އެއް އެއާޕޯޓުގެ މަސައްކަތް ނިމިފައިވާއިރު، ތިން އެއާޕޯޓުގެ މަސައްކަތް މިހާރު ކުރިއަށްދާކަންވެސް އެމަނިކުފާނު ފާހަގަކުރެއްވިއެވެ.