ސައްތައިން ސައްތަ މުސްލިމް ގައުމެއްގައި ދީނުން ބޭރުވާ މީހުންނަށް ދޭނެ އަދަބެއް ކަނޑައެޅިފައި އޮންނަން ޖެހޭ ކަމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހީމް ވިދާޅުވެއްޖެއެވެ.
ގާސިމް އެފަދައިން ވިދާޅުވީ އިސްލާމް ދީނާ ދެކޮޅު އަމަލުތަކަކީ ޖިނާޔަތުގެ 2 ވަނަ ދަރަޖައިގެ ކުށެއްކަމަށް ކަނޑައަޅަން އޭނާ ހުށަހަޅުއްވާފައިވާ ބިލު މަޖިލީހަށް ހުށަހަޅުއްވާ ދެއްވާ ވާހަކަދައްކަވަމުންނެވެ. މި ބިލުގެ ފުރަތަމަ ކިޔުން އިއްވާފައި ވަނީ މިދިޔަ މަހުގެ 31 ވަނަ ދުވަހުއެވެ. އެ ބިލުގެ އިބްތިދާއީ ބަހުސް މަރުހަލާގައި އެއްވެސް މެމްބަރަކު ވާހަކަދައްކަވަން ފުރުސަތަކަށް އެދިވަޑައިގަންނަވާފައެއް ނުވެއެވެ.
ގާސިމް ވިދާޅުވީ އެ މައްސަލަ ހުށަހެޅުއްވީ އިސްލާމް ދީނަށް ތައުހީނުކުރުމާއި، މާތްﷲއާއި ކީރި ޤުރުއާން އަދި ކީރިތި ރަސޫލާއަށް ފުރައްސާރަކުރުން އާއްމުވެ އިތުރުވަމުންދާތީ ކަމަށެވެ. ޚާއްސަކޮށް މުވާސަލާތީ ޕްލެޓްފޯމްތަކުގައި އެފަދަ އަމަލުތައް ހިންގުން އިތުރުވެފައިވާކަން ގާސިމް ވަނީ ފާހަގަކުރައްވާފައެވެ. ގާސިމް ވަނީ އެ ބިލާ މެދު މެމްބަރުން ވިސްނެވުމަށް ފަހު ވޯޓުދެއްވުމަށް އެދިވަޑައިގަންނަވާފައެވެ. ގާސިމް ހުށަހެޅުއްވި މައްސަލައިގައި ހަދީސްތަކުގެ އަލީގައި ދީނަށް ފުރައްސާރަކުރުމާއި ދީނުން ބޭރުވުމުގެ ނުބައިކަމުގެ މައްޗަށް އަލިއަޅުވާލައްވާފައިވެއެވެ.
މުރުތައްދުވުން އިސްލާމީ ޝަރީއަތާއި އެއްގޮތަށް ސާބިތު ނުވާނަމަ ދެވޭ ތައުޒީރީ އަދަބަކީ ޖުނަހުގެ މިންގަނޑުންކަމުގައި އޮތުމަކީ އިސްލާމީ ޝަރީއަތް ކުރެވޭ ތައުހީނެއްކަމަށް ނުވޭތޯ؟ ދިވެހިންނަކީ ސައްތައިން ސައްތަ މުސްލިމް ގައުމެއް ކަމުގައި އަދި ދިވެއްސަކަށް ވެވޭ ޝަރުތުތަކުގެ ތެރޭގައި މުސްލިމަކަށް ވުން ހިމެނޭ އިރު މީހަކު އިސްލާމް ދީނުން ބޭރުވެއްޖެ ނަމަ އެމީހަކާއި މެދު އަމަލު ކުރާނެ ގޮތެއް ސާފުކޮށް ބަޔާންކޮށްފައި އޮންނަން ޖެހޭގާސިމް އިބްރާހިމް
ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި، ގާނޫނުލްއުގޫބާތުގެ އިސްލާމް ދީނާ އިދިކޮޅު އަމަލުތައް ބަޔާންކޮށްފައިވާ ގޮތުން، އެ ކުށުގެ އަދަބަކީ ޖުނަހުގެ 1 ވަނަ ދަރަޖައެވެ. 2021 ވަނަ އަހަރު ގާނޫނުލްއުގޫބާތުގައި އެކުށް ބަޔާންކޮށްފައިވީ ނަމަވެސް ކުށުގެ އަދަބުގެ މިންވަރަށް ބަދަލެއްނާދެއެވެ. ޤާސިމް ހުށަހެޅުއްވި މައްސަލައިގައި ވަނީ، އެ މާއްދާ އެގޮތަށް އޮތުމުން އިސްލާމް ދީނާއި، ކީރިތި ޤުރުއާން އަދި ރަސޫލާއަށް ފުރައްސާރަކުރާ މީހުންނަށް އެކަށީގެންވާ އަދަބެއް ނުދެވޭކަމަށާއި، އެކަން އެގޮތަށް ދިމާވާ އެއް ސަބަބަކީ މިހާރު އެފަދަ އަމަލަކަށް ދިނުމަށް ކަނޑައަޅާފައިވާ އަދަބު ކުޑަވުމުންކަން ފާހަގަކުރައްވާފައެވެ.
އެހެންކަމުން އެފަދަ ކަންކަން ހައްލުކުރަން ގާނޫނުލްއުގޫބާތުގައި "އިސްލާމް ދީނާ އިދިކޮޅު އަމަލު" ކަމުގައި ބަޔާންކޮށްފައިވާ ކުށުގެ ދަރަޖަ ކަނޑައަޅައި، އެއީ ޖިނާޔަތުގެ 2 ވަނަ ދަރަޖައިގެ ކުށެއް ކަމަށް ކަނޑައަޅަން ޤާސިމް ވަނީ ހުށަހަޅުއްވާފައެވެ. އެ ބިލް ފާސްވެއްޖެނަމަ، ބިލް ތަސްދީގުކޮށް ގެޒެޓުގައި ސޮއިކުރާ ހިސާބުން ފެށިގެން އެ ގާނޫނަށް އަމަލުކުރަން ފަށާނެއެވެ.
