ބިންހެލުމާއި އެނޫންވެސް އެފަދަ ކަންކަމާ ގުޅިގެން އުސް އިމާރާތްތައް ވެއްޓި، ގާ ކުނޑިތަކުގެ ދަށުގައި މީހުން ތާށިވުމުގެ ހާދިޘާތައް ހިނގާ އިރު، އެ މީހުން ސަލާމަތް ކުރުމަށް ހިންގާ އޮޕަރޭޝަންތަތަކީ އެންމެ ހައްސާސް އެއް އޮޕަރޭޝަނެވެ.

ބަރު އުޅަނދު ފަހަރު ބޭނުން ކޮށްގެން ގާ ކުނޑިތަކުގެ ތެރޭގައި ދުއްވުމުގެ ކުރިން، މީހަކު ދިރިހުރިތޯ ބަލަން ޖެހެއެވެ. އެއީ އެތައް ވަގުތެއް ހޭދަ ވާ ކަމަށް ވީ ނަމަވެސް، އެފަދަ މާހައުލެއްގައި މާ ގިނަ އިރަކު އިންސާނަކަށް ދިރިއެއް ނޯވެވެއެވެ. އެހެން ކަމުން، އެކަމަށް ހައްލު ހޯދުމުގެ ގޮތުން އެކި ކަހަލަ އީޖާދުތައް ކުރަމުން ދާ އިރު، އެ ލިސްޓަށް އެންމެ ފަހުން އިތުރު ވީ ސައިބޯގް ކުރަފިތަކެކެވެ.

ސައިބޯގް ކުރައްޕަކީ އޯގޭނިކް އަދި މަސްނޫއީ ބައިތަކެއް އެކުލެވޭ ކުރަފިތަކެކެވެ. ޖަޕާނުގެ ރިސާޗަރުންތަކެއް މިކަން ކުރީ އިލެކްޓްރޯނިކް ޑިވައިސްތަކަކާއި ސޯލަރ ސެލްތަކެއް، ކުރަފީގައި ހަރުކޮށް، ރިމޯޓް ކޮންޓްރޯލްގެ އެހީގައި އެ ކުރަފިތަކުގެ ހަރަކާތްތައް ކޮންޓްރޯލް ކޮށްގެންނެވެ.

ދިރާސާ ކުރުމުގެ ދާއިރާގައި ޖަޕާނުގައި ގިނަ ބައެއްގެ އިތުބާރު ހޯދާފައި ވާ ރައިކެންގެ ތިން-ފިލްމް ޑިވައިސް ލެބޯޓްރީގައި، ސައިބޯގް ކުރަފި ތަރައްޤީ ކުރުމުގެ މަސައްކަތުގައި އިސްކޮށް ހަރަކާތްތެރިވީ ކެންޖީރޯ ފުކޫޑާއާއި އޭނާގެ ޓީމެވެ. ފުކޫޑާއާއި އޭނާގެ ޓީމުން އުފެއްދީ 4 މައިކްރޯންސްގެ ބޯ މިހުން ހުންނަ ސޯލަރ ސެލް ފިލްމެކެވެ. އެއީ އިންސާނެއްގެ ބޮލުގެ އިސްތަށީގެ ވަށަ މިނުގެ 25 ބައިކުޅަ 1 ބައި ބޯ މިނެވެ. އެ ފިލްމު ހަރުކުރަނީ ކުރަފީގެ ބަނޑުގައެވެ.

ފިލްމް ފަރުމާ ކޮށްފައި ވަނީ މިނިވަން ކަމާއެކު، ކުރައްޕަށް ހެލިފެލިވެ އުޅެވޭ ގޮތަށެވެ. އަދި ސޯލަރ ސެލްގެ އެހީގައި، އެ ސޫފީގެ ގުނަވަންތަކަށް އިރުޝާދު ފޮނުވުމަށް ދޭ އިރުޝާދުތަކުގެ ސިގްނަލް ފޯރުކޮށްދިނުމަށް ހަކަތަ އުފައްދައެވެ.

މި ޓެކްނޮލޮޖީއަކީ ސޫފާސޫފި ކޮންޓްރޯލް ކުރުމަށް ސިންގަޕޫރުގެ ނަންޔާންގް ޓެކްނޮލޮޖިކަލް ޔުނިވަރސިޓީއިން ބޭނުން ކުރި ތަޖުރިބާތަކެއް އަސްލަކަށް ބަލައިގެން ފަރުމާ ކުރި ޓެކްނޮލޮޖީއެކެވެ. ނަތީޖާއެއްގެ ގޮތުން، އިންސާނުންގެ ފުރާނައަށް އިންތިހާއަށް ނުރައްކާތެރި މާހައުލުތަކަށް ރޮބޮޓުން ފޮނުވުމުގެ ބަދަލުގައި ފޮނުވިދާނެ، ސައިބޯގް ސޫފީގެ ފައުޖުތަކެއް އުފެއްދިދާނެ ކަމަށް ސައެންސްވެރިން އުއްމީދު ކުރެއެވެ.

ސައިބޯގް ކުރަފި ތަރައްޤީ ކުރުމުގެ މަޝްރޫއަށް، ފުކޫޑާއާއި އޭނާގެ ޓީމުން ޚިޔާރު ކުރީ މަޑަގަސްކާ ހިސިންގް ކޮކްރޯޗްއޭ ކިއާ ޒާތުގެ ކުރަފިތަކެކެވެ. ސަބަބަކީ، އެ ޒާތުގެ ކުރައްޕަކީ ކަމަށް ހާއްސަކޮށްގެން ފަރުމާ ކުރި އާލާތްތައް އުފުލޭހާ ބޮޑު ކުރައްޕަކަށް ވެފައި، މަސައްކަތަށް ހުރަސް އަޅާނެ ފިޔަގަނޑެއް އެ ކުރަފީގައި ނެތުމެވެ. ކުރަފީގެ ބުރަކަށީގައި ދަބަހެއް ބަނދެ، ތެރަސް ލައިގެން ފިލްމެއް ތަތްކުރ ކަމުގައި ވީ ނަމަވެސް، ފަސޭހަ ކަމާއެކު އެ ސޫތްޕަށް ދަތުރުކޮށް އުޅެވެއެވެ. އަދި ފުށުން ޖެހިއްޖެ ހިނދެއްގައި، އަމިއްލައަށް ރަނގަޅުކޮޅަށް ޖެހި، ދުއްވައިގަތުމުގެ ޤާބިލުކަންވެސް އެ ބާވަތުގެ ކުރައްޕަށް ލިބިގެންވެއެވެ.

ޖަޕާނުގެ ދިރާސާ ޓީމުން ދަނީ ކުރަފީގެ ހަރަކާތްތައް ފައްކާ ކުރުމުގެ މަސައްކަތް ކުރަމުންނެވެ. ރިސާޗަރ ޔުޖީރޯ ކަކޭއީ ވަނީ ކޮމްޕިއުޓަރާއި ބްލޫޓޫތު ވަޔަލަސް ޓެކްނޮލޮޖީގެ އެހީގައި، ކުރަފިތައް ކޮންޓްރޯލް ކުރާ ގޮތް ދައްކާލާފައެވެ. ވާތަށް ދަތުރު ކުރަން ދިން އިރުޝާދަށް އެ ކުރަފި ކިޔަމަންވި ނަމަވެސް، ކަނާތަށް ދަތުރު ކުރަން އިރުޝާދު ދިނުމުން، ވަށް ބުރެއްގެ ބައްޓަމަށް ދަތުރު ކުރުން ނޫން ކަމެއް ނުވިއެވެ. ދިރާސާ ފުރިހަމަ ކުރުން އަދިވެސް އޮތީ ކުރިއަށެވެ.

ދިރާސާގައި ދެން އޮތީ މިކަމަށް ބޭނުންވާ އެކި އެކި ބައިތައް، ސޫފާސޫފިތަކަށް ފަސޭހަކަމާއެކު ހެލިފެލިވެއުޅެވޭ ވަރަށް ކުޑަ ކުރުމުގެ މަސައްކަތެވެ. ކުރަފީގެ ބުރަކަށީގައި ބަނދެފައިވާ ދަބަހުގައި ވާ ސާމާނު ގަތުމަށް ޚަރަދު ކުރީ 5000 ޔެން ނުވަތަ 35 ވަރަކަށް ޑޮލަރެވެ. ދަބަސް ފަރުމާ ކޮށްފައި ވަނީ ބާލާ ހެދޭ ގޮތަށެވެ.

ދިރާސާއަށް ބޭނުން ކުރާ ކުރަފިތައް ފުރާފުރިހަމަ ވަނީ 4 މަސްދުވަހުން ކަމަށް ވާ އިރު، އެއީ ބަންދުކޮށްގެން ގެންގުޅޭނަމަ 5 އަހަރެއްހާ ދުވަހަށް ދިރިއުޅޭ ކުރަފިތަކެއް ކަމަށް މައުލޫމާތު ލިބެއެވެ.