ރާއްޖޭގައި ފަށާ ސައުތު އޭޝިއަން ބާސްކެޓް އެސޯސިއޭޝަން (ސާބާ) ޗެމްޕިއަންޝިޕަކީ އަންހެން ކުޅުންތެރިންނަށް އަމާޒުކޮށްގެން ރާއްޖޭގައި ބާއްވާ ބާސްކެޓުގެ އެންމެ ބޮޑު މުބާރާތް ކަމަށާއި، އެއީ ލިބޭ ހިތްހަމަ ޖެހުމެއް ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.
މަޚްލޫފް މިހެން ވިދާޅުވީ މުބާރާތުގެ ކުރިން ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ. އެ ބައްދަލުވުމުގައި މިނިސްޓަރު ވިދާޅުވީ މި މުބާރާތަކީ މި އަހަރުގެ ތެރޭގައި ރާއްޖޭގައި ބާއްވާ ބައިނަލްއަޤުވާމީ ފަސް ވަނަ މުބާރާތް ކަމަށެވެ. މަޚްލޫފް ވިދާޅުވީ މުބާރާތަށް ތައްޔާރުވުމުގެ ގޮތުން ބާސްކެޓު އެސޯސިއޭޝަނާއި، ކުޅުންތެރިން އެދުނު ގޮތަށް މިހާރު ތިބީ ވެވުނު އެންމެ ރަނގަޅަށް ތައްޔާރުވެގެން ކަމަށެވެ.
މީގެ އިތުރުން މިނިސްޓަރު ވިދާޅުވީ މުބާރާތް ރާއްޖޭގައި ކުރިއަށްދާއިރު އެދެނީ އެންމެ ކަމަކަށް ކަމަށެވެ. އެއީ ރާއްޖޭގެ ފަސްގަނޑުގައި ދިވެހި ކުޅުންތެރިން ކުޅޭއިރު، އެ ކުޅުންތެރިންނަށް ސަޕޯޓުކޮށް، ހިތްވަރު ދިނުމަށް ވީހާ ވެސް ގިނަ ސަޕޯޓަރުން ގޮސް، ޒުވާނުންގެ މަރުކަޒު ފުރާލަ ދިނުން ކަމަށެވެ.
އަޅުގަނޑު އެދެނީ ހަމަ އެންމެ ކަމެއް. އަޅުގަނޑުމެންގެ މި ކުޅުންތެރިން އަޅުގަނޑުމެންގެ ކުރިމަތީގައި ރާއްޖޭގައި، ރާއްޖެއަށް ރީތި ވަނައެއް ހޯދުމަށް ކުރާ މި މަސައްކަތުގަ ވީހާ ވެސް ގިނަ ސަޕޯތަރުން ވަދެ، ސޯޝަލް ސެންޓަރު ހަމަ ފުރާލަ ދިނުން. އަޅުގަނޑު އުންމީދު ކުރަނީ ފަސް ޤައުމު މި ބައިވެރިވާ މުބާރާތުގައި، އިރާދަކުރެއްވިއްޔާމުން އަޅުގަނޑުމެންގެ އަންހެން ޓީމު ރާއްޖެއަށް ރީތި ވަނައެއް ހޯދައިދޭނެ ކަމަށް.އަޙުމަދު މަޚްލޫފް / މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް
މީގެ އިތުރުން މަޚްލޫފް ވިދާޅުވީ ބައިނަލްއަޤުވާމީ އެކިއެކި މުބާރާތްތައް ރާއްޖޭގައި ބޭއްވުމަކީ ކުޅިވަރު ޕްރޮމޯޓުކުރުމާއި، ކުރިއެރުވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އެންމެ މުހިންމު އެއް ވައުދުފުޅު ކަމަށެވެ. މިނިސްޓަރު ވިދާޅުވީ އެހެން ކުޅިވަރުތަކުން ވެސް އަހަރުގެ ބާކީ އޮތް މުއްދަތުގައި ވެސް ބައިނަލްއަޤުވާމީ މުބާރާތްތައް ބޭއްވުމަށް މަސައްކަތް ކުރާނެ ކަމަށެވެ.
އިތުރަށް ވާހަކަ ދައްކަވަމުން މިނިސްޓަރު ވަނީ މުބާރާތް މިހިސާބަށް ގެނައުމަށާއި، މުބާރާތުގެ ކަންކަމުގައި ބާސްކެޓު އެސޯސިއޭޝަނުން ކުރާ މަސައްކަތް ފާހަގަކޮށް، އެ އެސޯސިއޭޝަނަށް ޝުކުރު އަދާކުރައްވާފައެވެ. މީގެ އިތުރުން ޤައުމީ އަންހެން ޓީމުން ކާމިޔާބީ ހޯދުމަށް ކުރަމުންދާ ބުރަ މަސައްކަތް ފާހަގަކޮށް، މަޚްލޫފް ވަނީ ޓީމަށް ކާމިޔާބަށް ވެސް އެދިވަޑައިގެންފައެވެ.
މި މުބާރާތުގައި ރާއްޖޭގެ އިތުރުން ޖުމުލަ ފަސް ޤައުމަކުން ވާދަކުރާނެއެވެ. އެއީ އިންޑިއާ، ސްރީލަންކާ، ނޭޕާލް، ބޫޓާން އަދި ބަންގްލަދޭޝްއެވެ. މި މުބާރާތަށް ތައްޔާރުވުމުގެ ގޮތުން ޤައުމީ ޓީމުން ވަނީ އިންޑިއާ އަދި ތައިލެންޑުގައި ފަރިތަކުރުންތަކެއް ކުރިއަށް ގެންގޮސްފައެވެ.
މުބާރާތް ކުރިއަށް ދާނީ މި މަހުގެ 24 އިން 30 އަށް ޒުވާނުން މަރުކަޒުގެ އެތެރޭ ހޯލުގައެވެ.
