ރެއާލް މެޑްރިޑުން ބޭނުންވަނީ އެ ޓީމުގެ ކޯޗު ކާލޯ އަންޗެލޮޓީގެ އެއްބަސްވުން އައުކުރަން ކަމަށް މީޑިއާ ރިޕޯޓުތައް ބުނެފިއެވެ.

ދެވަނަ ފަހަރަށް އަންޗެލޮޓީ ރެއާލްގެ ކޯޗުކަމާއި ހަވާލުވީ 2021 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް ގިނަ ކާމިޔާބީތަކެއް ހޯދައިދީފައެވެ. ދެ ވަނަ ފަހަރަށް ރެއާލާ ހަވާލުވެ އަންޗެލޮޓީ ވަނީ އެ ޓީމާއެކު ސްޕެނިޝް ލީގާއި، ސްޕެނިޝް ސުޕަ ކަޕާއި، ޔުއެފާ ސުޕަ ކަޕްގެ އިތުރުން ޔުއެފާ ޗެމްޕިއަންސް ލީގު ކާމިޔާބުކޮށްފައެވެ.

ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން ރެއާލުން ބޭނުންވަނީ އަންޗެލޮޓީ އަދިވެސް އެ ޓީމުގައި މަޑު ކުރަން ކަމަށެވެ. އަދި ރެއާލުން އަންނަނީ އަންޗެލޮޓީއަށް އިތުރު އެއްބަސްވުމެއް ހުށަހެޅުމަށް ތައްޔާރުވަމުން ކަމަށް ވެސް ރިޕޯޓުތަކުގައިވެއެވެ. އެ ރިޕޯޓުތަކުގައިވާ ގޮތުން ރެއާލުން ބޭނުންވަނީ އަންޗެލޮޓީ 2025 ނުވަތަ 2026 ވަނަ އަހަރާ ހަމައަށް އެ ކުލަބުގައި މަޑުކުރަން ކަމަށެވެ.

އުމުރުން 63 އަހަރުގެ އަންޗެލޮޓީ މީގެ ކުރިން ބުނީ އޭނާ ރިޓަޔާ ކުރާނީ ރެއާލުން ކަމަށެވެ. އަދި ރެއާލަށްފަހު އޭނާ ދެން ކޯޗުކަން ކޯށްދޭނެ އެހެން ޓީމެއް ނޯންނާނެ ކަމަށެވެ.