ރޮބިންސަން ކްލަބް މޯލްޑިވްސްގެ ލޯންޑްރީއެއްގައި އަލިފާނުގެ ހާދިސާއެއް ހިނގާ ގެއްލުންތަކެއް ވެއްޖެއެވެ.

ރާއްޖެއެމްވީ އަށް މައުލޫމާތު ދެމުން ރޮބިންސަން ކްލަބް މޯލްޑިވްސްގެ މުވައްޒަފަކު ބުނީ ސްޓާފް ލޯންޑްރީގައި އަލިފާނުގެ ހާދިސާ ހިނގީ މެންދަމު 2 ޖެހާއިކަށްހާ އިރުކަމަށާއި، އަލިފާންގަނޑު ކޮންޓްރޯލްވީ ގަޑިއެއްހާއިރު ފަހުން ކަމަށެވެ. އެހެންނަމަވެސް އޭނާ ބުނީ ލޯންޑްރީން އަރަމުންދިޔަ ދުންގަނޑު ކޮންޓްރޯލްވީ 3:30 އިރުކަމަށެވެ.

އަލިފާން ރޯވި ވަގުތަކީ ހުރިހާ މުވައްޒަފުންވެސް ހާރުކާން ހޭލާ ތިބި ވަގުތަށްވުމުން އަލިފާންގަނޑު ނިއްވާލީ މުވައްޒަފުންގެ އެއްބާރުލުމުން ކަމަށްވެސް އޭނާ ވަނީ ބުނެފައެވެ.

"އަލިފާން ރޯވީ އެންމެން ހާރުކާން ހޭލާތިބި ވަގުތު. ރިސޯޓުގެ އެކި ސަރަހައްދުން އަލިފާން ނިއްވާ ފުޅި ހިފައިގެން އައިސް ހުރިހާ މުވައްޒަފުން އަލިފާންގަނޑު ނިއްވާލީ. ސްޓާފުންގެ ބެކަޕް ޔުނިފޯމްތައް ވަނީ އަނދާ ހުލިވެފައި" ރިސޯޓުން މައުލޫމާތު ދިން މުވައްޒަފު ރާއްޖެއެމްވީއަށް މައުލޫމާތު ދެމުން ބުނި އެވެ.

އޭނާ ބުނީ ބޮޑަށް ބެލެވޭގޮތުގައި އަލިފާން ރޯވީ ލޯންޑްރީގެ މެޝިނެއްގެ ކަރަންޓު ޝޯޓްވެގެން ކަމަށާއި، މި ހާދިސާއާއެކު ސްޓާފުންގެ ގިނަ ބެކަޕް ޔުނިފޯމްތައް އަނދާފައިވާ ކަމަށެވެ. އަދި ލޯންޑްރީ ތެރޭގައި އޮތް ބަގީއެއްގައިވެސް ރޯވިކަމަށް އޭނާ ބުނިއެވެ. އެހެންނަމަވެސް ބަގީ ބޭނުންނުކުރެވޭ ވަރަށް ހަލާކުނުވާކަމަށް އޭނާ ވަނީ ބުނެފައެވެ.

ރޮބިންސަން ރިސޯޓުގެ މެނޭޖްމަންޓުން ވަނީ އެ ރިސޯޓުގައި އަލިފާނުގެ ހާދިސާއެއް ހިނގިކަން ރާއްޖެއެމްވީއަށް މައުލޫމާތު ދީފައެވެ. މިކަމާ ގުޅިގެން ފުލުހުންގެ ބަހެއް އަދި ނުލިބެއެވެ.