ބޮޑު މޮޅަކާއެކު އިންޑިއާ ބަލިކޮށް، ޕާކިސްތާނުން އައިސީސީ ޓްރޮފީ އުފުލާލައިފިއެވެ.
އިނގިރޭސިވިލާތުގެ ލަންޑަންގެ ދަ އޯވަލްގައި ކުޅުނު މި މެޗުގައި ފުރަތަމަ ކުޅެން އެރީ ޕާކިސްތާނުންނެވެ. އެޓީމުން ވަނީ ކުޅެން އަރާ ހަތަރު ކުޅުންތެރިން ނުބައިވެގެން 50 އޯވަރު ތެރޭގައި 338 ލަނޑު ހަދާފައެވެ. މިއީ 1992 ވަނަ އަހަރަށްފަހު ޕާކިސްތާނުން 50 އޯވަރާއެކު އައިސީސީ ޓްރޮފީ ހޯދި ފުރަތަމަ ފަހަރެވެ.
ޕާކިސްތާން ޓީމުގެ ފަހަރް ޒަމާން ސެންޗަރީއެއް ހަދާފައިވާއިރު، މުހައްމަދު ހަފީޒް ވަނީ ނުބައިނުވެ 57 ލަނޑު ހަދާފައެވެ. މީގެއިތުރުން އަޒްހަރު އަލީ 59 ލަނޑު ހަދާފައިވާއިރު، ބަބާ އަޒަމް ވަނީ 46 ލަނޑު ހަދާފައެވެ.
ޖަވާބުގައި އިންޑިއާ އިން ކުޅެން އަރާ ހުރިހާ ކުޅުންތެރިން ނުބައިވެގެން ހެދުނީ 158 ލަނޑެވެ. އިންޑިއާ ޓީމުގެ ހަރްދިކް ޕަންޑްޔާ 76 ލަނޑު ހަދާފައިވާއިރު، ޔުވްރާޖް ސީންގް ވަނީ 22 ލަނޑު ހަދާފައެވެ.
ޕާކިސްތާނަކީ މިފަހަރުގެ މުބާރާތުގައި ވާދަކުރާ އެންމެ ދަށަށް ރޭންކުކޮށްފައިވާ ޓީމެވެ. އެޓީމު ދުނިޔޭގެ ހަވަނައަށް ރޭންކުކޮށްފައިވާއިރު، އިންޑިއާ ރޭންކުކޮށްފައިވަނީ ދުނިޔޭގެ އެއްވަނައަށެވެ.
މެޗަށްފަހު ވާހަކަ ދައްކަމުން ޕާކިސްތާންގެ ކެޕްޓަން ސަފްރާޒް އަހުމަދު ބުނީ ގްރޫޕް ސްޓޭޖުގައި އިންޑިއާ އަތުން ބަލިވުމުންވެސް މުބާރާތް އަދި ނުނިމޭ ކަމަށާއި، އަދިވެސް ކާމިޔާބުކުރެވޭނެކަން ކުޅުންތެރިންނަށް ވިސްނައިދީފައިވާނެކަމަށެވެ. އެގޮތުން ހުރިހާ ޝުކުރެއްވެސް ހައްގީ ކުޅުންތެރިންނަށް ކަމަށް އޭނާ ވަނީ ބުނެފައެވެ.
Pakistan clinched the ICC champions trophy, beating India by 180 runs Congratulations Pakistan @Raajje_tv #PAKvIND #CT17 pic.twitter.com/tz1f9ULgzo
— RaajjeTV Sport (@RaajjeTVsport) June 18, 2017
މެޗަށްފަހު ވާހަކަދައްކަމުން އިންޑިއާގެ ކެޕްޓަން ވިރާތް ކޯލީ ބުނީ އިންޑިއާގެ ހުރިހާ ކުޅުންތެރިންވެސް މެޗު ކާމިޔާބުކުރަން ކުރެވެން އޮތް ހުރިހާ މަސައްކަތެއް ކޮށްފައިވާ ކަމަށާއި، އެހެންނަމަވެސް ކޮންމެ ދުވަހަކު މޮޅުނުވާނެކަން އެއީ ގަބޫލުކުރަންޖެހޭ ހަގީގަތެއް ކަމަށެވެ.
މުބާރާތުގައި ޕާކިސްތާން ވަނީ ދުނިޔޭގެ ދެވަނައަށް ރޭންކުކޮށްފައިވާ ސައުތް އެފްރިކާ އަދި ތިންވަނައަށް ރޭންކުކޮށްފައިވާ އޮސްޓްރޭލިއާވެސް ބަލިކޮށްފައެވެ. ޕާކިސްތާން ހޯދި ކާމިޔާބީއާއެކު އެގައުމުގައި އަންނަނީ އުފާފާޅުކުރަމުންނެވެ.
