އެމްޓީސީސީ ނޯތު ލީގުގެ ދެވަނަ ޑިވިޝަން ގްރޫޕް ޑީގައި ދުވާފަރު ބަލިކޮށް, އަލިފުށިން ފުރުސަތު ހޯދައިފިއެވެ.
އަލިފުށިން ނޯތު ލީގު އެއްވަނަ ޑިވިޝަންގެ ޖާގަ ހޯދުމުގެ ފުރުސަތު ތަނަވަސްކުރީ 3-1ން ދުވާފަރު ބަލިކޮށް ހޯދި ތިން ޕޮއިންޓާއެކު ހަތަރު ޕޮއިންޓް ހަމަކޮށްގެންނެވެ. މިމޮޅާއެކު ތިން މެޗުން އަލިފުށި ވަނީ ހަތަރު ޕޮއިންޓް ހޯދާފައެވެ. ދުވާފަރަށް ތިން މެޗުން ލިބެނީ ދެ ޕޮއިންޓެވެ. އުނގޫފާރު އޮތީ ދެ މެޗުން ހަތަރު ޕޮއިންޓާއެކުއެވެ.
ދުވާފަރު އަތުން މޮޅުވި މެޗުގައި ފުރަތަމަ ތިން ލަނޑުވެސް ޖެހީ އަލިފުށީ ޓީމުންނެވެ. އެޓީމުގެ ލަނޑުތައް ޖެހީ އަބްދުﷲ އާދަމް, އިސްމާއީލް ނަސީމް، އަދި އަބްދުﷲ ފާރިޝްއެވެ. ދުވާފަރުގެ ހަމައެކަނި ލަނޑު މެޗުގެ އިތުރު ވަގުތުގައި ޖެހީ އަހުމަދު މައިސޫންއެވެ.
ތިން ޓީމް ވާދަކުރާ ގްރޫމުން ނޯތު ލީގު އެއްވަނަ ޑިވިޝަނުން ޖާގަ ލިބޭނީ ދެ ޓީމަށެވެ.
