ޓީމު ދޫކޮށް ކުޅުންތެރިޔަކު ގޮސްފި ނަމަ، އޭނާގެ ބަދަލު އެހެން ކުޅުންތެރިޔަކު ބޭނުންވާ ކަމަށް ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނެފިއެވެ.

ކޮންޓޭ މިހެން ބުނެފައިވާއިރު ޓޮޓެންހަމްގެ ބްރައިޔަން ގިލް ހޯދުމުގެ މަސައްކަތް ސްޕެއިންގެ ވެލެންސިއާ އިން ކުރަމުން އަންނަ ކަމަށް މީޑިއާ ރިޕޯޓުތައް ބުނެއެވެ. ގިލް ހޯދުމުގެ މަސައްކަތް ވެލެންސިއާ އިން ކުރަމުން އަންނަނީ ލޯނު އެއްބަސްވުމެއްގެ ދަށުންނެވެ. ނަމަވެސް ޓޮޓެންހަމުން ގިލް ދޫކޮށްލާނީ އޭނާގެ ބަދަލު އެޓީމަށް އެހެން ކުޅުންތެރިޔަކު ލިބިއްޖެނަމަ ކަމަށް މީޑިއާ ރިޕޯޓުތައް ބުނެއެވެ.

ކޮންޓޭ ބުނީ ކުޅުންތެރިޔަކު ދޫކޮށްލާނަމަ، އޭނާ ދެކޭ ގޮތުގައި އެ ކުޅުންތެރިޔެއްގެ ބަދަލު އެހެން ކުޅުންތެރިޔަކު ޓޮޓެންހަމަށް ލިބެންޖެހޭ ކަމަށެވެ. މީގެ އިތުރުން ކޮންޓޭ ބުނީ އޭނާ ބޭނުންވަނީ ކޮންމެ މަގާމަކަށް ކުޅޭ ކުޅުންތެރިން ހިމެނޭ ސްކޮޑެއް ކަމަށެވެ. މީގެ އިތުރުން ކޮންޓޭ ވަނީ މިހާރު ޓޮޓެންހަމްގައި އޮތް ސްކޮޑް އާއި މެދު ހިތްހަމަ ޖެހޭ ކަމަށް ވެސް ބުނެފައެވެ.

ކޮންޓޭގެ އިރުޝާދުގެ ދަށުން މި ސީޒަންގައި ޓޮޓެންހަމް އަންނަނީ ރަނގަޅު ކުޅުމެއް ދައްކަމުންނެވެ. ލީގުގައި މިހާތަނަށް އެ ޓީމު ވަނީ ތިން މެޗު ކުޅެފައެވެ. އޭގެ ތެރެއިން ދެ މެޗުން މޮޅުވެފައިވާއިރު، އެއް މެޗުން ވަނީ އެއްވަރުވެފައެވެ. ތިން މެޗުން ލިބުނު ހަތް ޕޮއިންޓާއެކު ޓޮޓެންހަމް އޮތީ ލީގު ތާވަލްގެ ހަތަރު ވަނައިގައެވެ.

ލީގުގައި ދެން ޓޮޓެންހަމް އަށް އޮތީ އާދިއްތަ ދުވަހުގެ ރޭ ނޮޓިންހަމް ފޮރެސްޓާ ދެކޮޅަށް ކުޅޭ މެޗެވެ.