ސައުދީ އަރަބިއްޔާއިން ޕާކިސްތާނުގައި އެއްބިލިއަން ޑޮލަރު އިންވެސްޓް ކުރުމަށް އެޤައުމުގެ ރަސްގެފާނު ސަލްމާން ބިން އަބްދުލް އަޒީޒް އިރުޝާދު ދެއްވައިފިއެވެ. މިކަމަކީ ޕާކިސްތާންގެ ރައްޔިތުންނަށާއި އަދި އެގައުމުގެ އިގްތިސާދު ރަނގަޅު ކުރުމަށް ސައުދީއިން ވެދޭ އެހީއެއްކަމަށް ސައުދީ ޕްރެސް އޭޖެންސީ އިން ބުނެފައިވެއެވެ.
ސައުދީ ސަރުކާރުގެ ނިންމުން މިހާރުވަނީ ސައުދީ ފޮރިން މިނިސްޓަރު ޕްރިންސް ފައިސަލް ބިން ފަރްހާން ޕާކިސްތާންގެ ޚާރިޖީ ވަޒީރު ބިލާވަލް ބުއްޓޯ ޒަރދާރީއަށް ދަންނަވާފައެވެ. ދެބޭފުޅުން ބުރާސްފަތި ދުވަހު ފޯނުން ބައްދަލުކުރައްވާ ވަނީ އެދެގައުމު ދެމެދު އޮތް ވަރުގަދަ ގުޅުންތައް އިތުރަށް ބަދަހި ކުރެވޭނެ ގޮތްތަކާ ބެހޭ ގޮތުން މަޝްވަރާ ކުރައްވާފައެވެ. މީގެ އިތުރުން ދެބޭފުޅުން ޝައުގުވެރިވެ ވަޑައިގަންނަވާ ސަރަހައްދީ އަދި ބައިނަލްއަޤްވާމީ މައްސަލަތަކާއި ބެހޭ ގޮތުން މަޝްވަރާ ކުރައްވާފައިވެއެވެ.
