މޮންޓެނީގްރޯގައި އެ ގައުމުގެ ޕްރައިމް މިނިސްޓަރު ޑްރިޓަން އަބަޒޮވިކްގެ ވަޒީރުންގެ މަޖިލީހުގެ އިތުބާރު ނެތް ކަމަށް އެ ގައުމުގެ މަޖިލީހުން ނިންމައިފިއެވެ.
ހޮނިހިރު ދުވަހު އެ ގައުމުގެ މަޖިލީހުން މިގޮތަށް ނިންމާފައި ވަނީ 36 ޑެޕިއުޓީ އަކު ހުށަހެޅި ހުށަހެޅުމަކާއި ގުޅިގެންނެވެ. މިއީ މި އަހަރު އެ ގައުމުގައި ނެގި އިތުބާރު ނެތްކަމުގެ ދެ ވަނަ ވޯޓެވެ. މީގެ ކުރިން އެ ގައުމުގައި މިފަދަ ވޯޓެއް ނަގާފައި ވަނީ މިދިޔަ ފެބްރުއަރީ މަހުގެ ތެރޭގައެވެ. އެއީ އޭރުގެ ބޮޑުވަޒީރު ޒްޑްރާވްކޯ ކްރިވޮކަޕިގެ ކެބިނެޓާއި ދެކޮޅަށް ނެގި ވޯޓެކެވެ. އެ ވޯޓް ނެގީ ސަރބިއަން އޮތޮޑޮކްސް ޗަރޗްގެ އެއްބާރުލުމާއި އެކުގައެވެ.
މޮންޓެނީގްރޯގެ ބޮޑުވަޒީރު އަބަޒޮވިކް ވަނީ އޭނާގެ ސަރުކާރުގެ ކުރު މުއްދަތުގައި 100 ވަރަކަށް ދުވަހުގެ ތެރޭގައި ކުރެވުނު މަސައްކަތާއި މެދު ހިތްހަމަޖެހޭ ކަމަށް ވިދާޅުވެފައެވެ. އަދި އޭނާގެ ސަރުކާރު ވެގެންދާނީ އެންމެ ކުރު އެހެންނަމަވެސް އެންމެ އުނދަނގޫ ނިންމުންތައް ނިންމި ސަރުކާރަށް ކަމަށް އޭނާ ވަނީ ވިދާޅުވެފައެވެ.
އެޤައުމުގެ މަޖިލީހުގެ މި ނިންމުމާ އެކު މޮންޓެނީގްރޯގެ ރައީސް މިލޯ ޖުކާނޮވިކްއަށް އާ ބޮޑުވަޒީރެއް އައްޔަނުކުރައްވަން ޖެހިވަޑައިގަންނަވާނެއެވެ. މޮންޓެނީގްރޯ އަކީ ޔޫރަޕިއަން ޔޫނިއަން އިން ޖާގަ ހޯދުމަށް އުންމީދުކުރާ ގައުމެކެވެ. އެހެންކަމުން ދައުރުގެ މެދުތެރެއިން އިންތިޚާބެއް ފެނުމަކީ އެކަށީގެންވާ ކަމެއް ކަމަށް މީޑިއާ ރިޕޯޓްތައް ބުނެއެވެ.
625000 މީހުންގެ އާބާދީއެއް އޮތް މި ގައުމުގެ ސިޔާސީ ފިކުރު ހިނގަނީ ރަޝިއާ އަށް ތާއީދު ކުރާ ސަރބުންނާއި، އެ ނޫން މީހުންގެ މައްޗަށެވެ. ރަޝިއާ އަށް ތާއީދު ކުރާ ފަރާތްތަކަކީ "މޮންޓެނެގްރިންސް" އެވެ. ރަޝިއާ އަށް ތާއީދު ކުރާ ފަރާތްތަކަކީ މޮންޓެނީގްރޯ މިނިވަން ދައުލަތެއްގެ ގޮތުގައި މިހާރު އޮންނަ ގޮތް ބަލައިގަންނަ ބައެއް ނޫނެވެ.
