ޕެސިފިކް ސަރަހައްދުގައި އެކަހެރިކޮށް އޮންނަ ޖަޒީރާ ޤައުމެއް ކަމަށްވާ މާޝަލް އައިލަންޑްސްގައި ފުރަތަމަ ފަހަރަށް ކޮވިޑް19 ފެތުރެމުން ދާކަމަށް ޚަބަރު ލިބިއްޖެއެވެ.

އެޤައުމުގެ ވެރިރަށް މަޖޫރޯ ސިޓީއިން ހުކުރު ދުވަހު ރިޕޯޓްކުރި ޕޮޒިޓިވް ބަލި މީހުންގެ އަދަދު މިހާރުވަނީ ދެގުނަ އިތުރުވެފައި ކަމަށް ޚަބަރުތައް ބުނެއެވެ. އެގޮތުން ކެޕިޓަލް ސިޓީގެ ކޮންމެ ދިހަ މީހަކުން އެކަކަށް މިހާރު ބަލި ޖެހިފައިވާ ކަމަށް ވެއެވެ.

އާދީއްތަ ދުވަހު އެގައުމުގެ ހެލްތު ސެކްރެޓަރީ ޖެކް ނީޑެންތާލް ވިދާޅުވީ މިވަގުތު ހެދޭ ޓެސްޓްތަކުގެ ހަތްދިހަ ފަހެއް އިންސައްތަ ޓެސްޓް ޕޮޒިޓިވްވާކަމުގައެވެ.

ޕެސިފިކް ޖަޒީރާތަކުން މީގެ ކުރިން ވަނީ ކޮވިޑް19 ބަލި ގައުމަށް ވަނަ ނުދީ ކާމިޔާބު ކަމާއެކު މަސައްކަތް ކޮށްފައިވެއެވެ. 59000 މީހުންގެ އާބާދީ އެއް އޮންނަ މާޝަލް އައިލަންޑްސް އަކީވެސް މިގޮތުން ކާމިޔާބު ކަމާއެކު ކޮވިޑް އިތުރު ވިޔަނުދީ ހިފަހައްޓާފަ އޮތް ގައުމެކެވެ. އެގައުމުން ފުރަތަމަ ދެ ކޭސް ފެނިފައިވަނީ އޮކްޓޯބަރ 2020 ވަނަ އަހަރުއެވެ. އެއީ އެމެރިކާއިން ދަތުރުކޮށްފައި ދިޔަ ދެމީހުންގެ ފުށުންނެވެ. އެދެމީހުން އައިސޮލޭޓްކޮށްފައި ބޭއްތިއްބުމަށް ފަހު ބަލި ކޮންޓްރޯލް ކުރެވި، މީގެ ހަފްތާއެއްހާ ދުވަސް ކުރިޔާ ޖެހެންދެން މާޝަލް އައިލަންޑްސްގައި ކޮވިޑް19 ގެ ކަންބޮޑުވުން ނެތްކަމަށް ވެއެވެ. ނަމަވެސް ހޯމަ ދުވަހު ސަރުކާރުން ވަނީ އެގައުމުގައި ކޮމިޔުނިޓީ ސްޕްރެޑްއެއް އުޅޭކަން ޔަގީން ކޮށްދީފައެވެ. މިހާރު އެގައުމުގަ ވަނީ ސްޓޭޓް ހެލްތު ޑިޒާސްޓަރ އިއުލާންކޮށް ސްކޫލްތައް ބަންދުކޮށް އަދި އިތުރު ފިޔަވަޅުތައް ވެސް އަޅާފައެވެ.

މާޝަލް އައިލަންޑްސްގައި އަދި ލޮކްޑްއުން އިއުލާން ނުކުރި ނަމަވެސް، ގިނަ އަދަދެއްގެ މީހުން އަމިއްލަ އިޙްތިޔާރުން ބޭރަށް ނުނިކުންނަ ކަމަށް ރޭޑިއޯ ނިއުޒިލަންޑް އާއި ހަވާލާދީ ލިބޭ ޚަބަރުތައް ބުނެއެވެ.

އޮކްޓޯބަރ 2020 ގެ ފަހުން އެގައުމުގައި ކޮވިޑް19 ޖެހިގެން މަރުވި ކަމަށް ބެލެވެނީ 2 މީހުންނެވެ.      

ހޯމަ ދުވަހުން ފެށިގެން ހޮސްޕިޓަލްގައި އެޑްމިޓްކޮށްގެން 9 މީހުންނަށް ފަރުވާ ދެމުން ދާކަމަށް ޚަބަރު ލިބެއެވެ. އެގައުމުގެ 70 އިންސައްތަ މީހުން ވަނީ ކޮވިޑް19 ވެކްސިން ފުރިހަމަކޮށްފަކަމަށް ވެއެވެ.

މާޝަލް އައިލަންޑްސް ވެފައި މިވަނީ ދުނިޔޭގައި އެންމެ ފަހުން ކޮވިޑް19 ފެތުރެން ފެށި އެއްގައުމަށެވެ.