އިނގިރޭސި ޕްރިމިއަރ ލީގުގައި ޗެލްސީއާ ދެކޮޅަށް ކުޅުނު ފުޓުބޯޅަ މެޗުގެ ފަހު ވަގުތުގައި ހެރީ ކޭން ޖެހި ލަނޑުން ޓޮޓެންހަމް ސަލާމަތްވެއްޖެއެވެ.

ލީގުގައި ދެ ޓީމު ވެސް ކުޅުނު ފުރަތަމަ މެޗުން ވަނީ މޮޅުވެފައެވެ. ޗެލްސީގެ ދަނޑުގައި އާދިއްތަ ދުވަހުގެ ރޭ ކުޅުނު މެޗު ނިމުނީ 2-2 އިން އެއްވަރުވެގެންނެވެ.

މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ޗެލްސީންނެވެ. މެޗުގެ 19 ވަނަ މިނެޓުގައި އެ ޓީމަށް ލީޑު ނަގައިދިން ލަނޑު ޖެހީ ކަލީދޫ ކުލިބާލީއެވެ. ފުރަތަމަ ހާފު ނިމުނީ 1-0 އިން ޗެލްސީ ކުރީގައި އޮވެގެންނެވެ. ނަމަވެސް ދެ ވަނަ ހާފު ފަށައިގެން މެޗުގެ 68 ވަނަ މިނެޓުގައި ޕިއޭ އެމީލް ހޮއިބިއާ ވަނީ ލަނޑެއް ޖަހައި ޓޮޓެންހަމަށް ނަތީޖާ ހަމަހަމަކޮށްދީފައެވެ.

ދެ ޓީމު އެއްވަރުކޮށް އޮވެ ކުޅެނުން ދަނިކޮށް، ޗެލްސީން ވަނީ އިތުރު ލަނޑެއް ޖަހައި ދެ ވަނަ ފަހަރަށް ލީޑު ނަގާފައެވެ. އެއީ 77 ވަނަ މިނެޓުގައި ރަހީމް ސްޓާލިންގެ އެހީތެރިކަމާއެކު ރީސް ޖޭމްސް ޖެހި ލަނޑެކެވެ. އެ ލަނޑާއެކު ޗެލްސީ މޮޅުވާން ދަނިކޮށް، ޓޮޓެންހަމުން ދެ ވަނަ ފަހަރަށް ނަތީޖާ ހަމަހަމަކުރީ އިތުރު ވަގުތުގެ ހަ މިނެޓުގެ ތެރޭގައި ކޭން ޖެހި ލަނޑުންނެވެ.

މެޗަށްފަހު ޗެލްސީގެ ކޯޗު ތޯމަސް ޓުޗެލް އާއި ޓޮޓެންހަމްގެ ކޯޗު އެންޓޯނިއޯ ކޮންޓޭގެ މެދުގައި ހިނގި ހަމަނުޖެހުމުގެ ތެރެއިން ރެފްރީ ވަނީ ދެ ކޯޗުންނަށް ދެ ވަނަ ރީނދޫ ކާޑާއެކު ރަތް ކާޑު ދައްކާފައެވެ. ފުރަތަމަ ރީނދޫ ކާޑު ދެއްކީ މެޗުގެ ތެރެއިންނެވެ.