ހ. ޝީރީންވިލާގައި އަނިޔާވެރިގޮތަކަށް މަރާލާފައި އޮއްވާ ހޮނިހިރު ދުވަހުގެ ރޭ ފެނުނު ޝިއާއު މުހައްމަދު ސައީދު މަރާލުމަށް ބޭނުންކުރި ހަތިޔާރުތައް ހޯދާފައިވާކަމަށް، ފުލުހުންގެ މޭޖަރ ކްރައިމް އިންވެސްޓިގޭޝަންގެ ހެޑް، ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވެއްޖެއެވެ.

ޝިއާއު މުހައްމަދު ސައީދުގެ މަރާގުޅޭ މައުލޫމާތުދިނުމަށް ބޭއްވި ނޫސްވެރިންގެ ބައްދަލުވުމުގައި ޝިފާއު ވިދާޅުވީ، ހ. ޝީރީންވިލާގައި މީހަކު މަރާލާފައި އޮތްކަމުގެ މައުލޫމާތު އާއްމު މީހެއްގެ ފަރާތުން ފުލުހުންނަށް ރިޕޯޓްކޮށްފައިވަނީ ހޮނިހިރު ދުވަހުގެ ރޭ 11:28 ހާއިރުކަމަށެވެ. އަދި ހަތަރު ވަރަކަށް މިނެޓްގެ ތެރޭގައި ފުލުހުން ސީންއަށް ދިޔަކަމަށެވެ. ޝިއާއު މަރާލުމަށް ބޭނުންކުރި ހަތިޔާރުތައް ފުލުހުން ހޯދާފައިވާއިރު، މި މައްސަލައިގެ ތަހުގީގު އަދިވެސް ކުރިއަށްދާތީ އިތުރު ތަފްސީލު ހާމައެއްނުކުރެއެވެ.

އެތަނަށް ފުރަތަމަ ދިޔަ ފުލުހުންގެ ޓީމުން ހެކި ރައްކާތެރިކޮށް، ވަގުތުން ތަހުގީގު ފެށިކަން ފާހަގަކުރައްވައި ޝިފާއު ވިދާޅުވީ، އަންހެންކުއްޖާގެ ހަށިގަނޑުގެ ޕޯސްޓްމޯޓަމެއް ހެދުމަށް ނިންމާފައިވާކަމަށެވެ. ޝުއާއުގެ ފަރާތުން މީގެކުރިން ގެވެށި އަނިޔާގެ އެއްވެސް މައްސަލައެއް ރިޕޯޓްކޮށްފައި ނުވާކަމަށްވެސް ޝިފާއު ވިދާޅުވިއެވެ.

އަންހެން ކުއްޖާ އަނިޔާވެރި ގޮތަކަށް މަރާލާފައިވާއިރު، އަންހެން ކުއްޖާގެ އާއިލާގެ އެދުމަކަށް، އޭނާއަށް ލިބިފައިވާ އަނިޔާތަކުގެ ތަފްސީލް ހާމަނުކުރަން ފުލުހުން ނިންމާފައިވާކަމަށްވެސް ޝިފާއު ވިދާޅުވިއެވެ. ފުލުުހުން ބުނީ މިހާތަނަށް އައިއިރު ބައެއް މީޑިއާތަކުން އަންހެން ކުއްޖާގެ މަރާގުޅިގެން ހަގީގަތާ ޚިލާފު ވާހަކަތައްވެސް ފަތުރަމުންދާ ކަމަށެވެ. އަދި މިފަދަ މައްސަލައެއްގައި އެގޮތަށް މައުލޫމާތު ނުފެތުރުމަށް ފުލުހުން ވަނީ އެދިފައެވެ.