ބޮޑު ބްރޭކަކަށްފަހު އަންނަ ބުރާސްފަތި ދުވަހު އެސްޓީއޯ މާލެ ލީގުގެ ކުޅުން ފަށާ ގޮތަށް ހަމަޖެހިއްޖެއެވެ.

މިދިޔަ މަހުގެ 26 ވަނަ ދުވަހު ލީގު ކުޅުން މެދުކަނޑާލީ، އޭއެފްސީ ކަޕްގައި މާޒިޔާއަށް މުހިންމު މެޗުތަކެއް ކުޅެން ޖެހިފައި ހުރުމުންނާއި، މިމަހުގެ 13 ވަނަ ދުވަހު އޭޝިއަން ކަޕް ކޮލިފައިންގައި ގައުމީ ޓީމު ބޫޓާން އާއި ދެކޮޅަށް ކުޅޭ މެޗަށް ވަގުތު ދިނުމުގެ ގޮތުންނެވެ.

ވިހި ދުވަހުގެ ބްރޭކަކަށްފަހު މިމަހުގެ 22 ވަނަ ދުވަހު ލީގު ކުޅުން އަލުން ފެށުމަށް ހަމަޖެހިފައިވަނީ މާޒިޔާ ސްޕޯޓްސް އެންޑް ރެކްރިއޭޝަން އާއި ކްލަބް އީގަލްސް ބައްދަލުކުރާ މެޗުންނެވެ. ލީގު ކުޅުން މެދުކަނޑާލާފައިވަނީ ގްރީން ސްޓްރީޓާއި ނިއުރޭޑިއަންޓް ބައްދަލުކުރި މެޗުންނެވެ. އެ މެޗް 3-0 ގެ ނަތީޖާއަކުން ކާމިޔާބުކޮށްފައިވަނީ ގްރީން ސްޓްރީޓުންނެވެ.

ލީގުގެ ކުޅުން މަޒިޔާ އާއި އީގަލްސް ބައްދަލުކުރާ މެޗުން ފަށާއިރު، މިހާތަނަށް މި ދެޓީމް ފިޔަވާ، ކޮންމެ ޓީމަކުންވެސް ވަނީ 9 މެޗު ކުޅެފައެވެ.

ލީގު ކުޅުން އަލުން ފަށާއިރު، އެއްވަނާގައި އޮތީ އެންމެ ފަހުގެ ދިވެހި ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އެވެ. ދެވަނާގައި ނިއުރޭޑިއަންޓް އޮތްއިރު، ތިންވަނާގައި އޮތީ މިއަހަރު މުޅިން އަލަށް ފުރަތަމަ ޑިވިޝަނަށް ކޮލިފައިވެ ރަނގަޅު ނަތީޖާތަކެއް ނެރެމުން އަންނަ ކްލަބް ގްރީން ސްޓްރީޓް އެވެ. ހަތަރު ވަނައިގައި ޓީސީ އޮތްއިރު އެ ކުލަބާއި އެންމެ ވާދަވެރި ވިކްޓްރީ އޮތީ ފަސްވަނައިގައެވެ.ގަދަ  ހަތަރަކަށްވާދަކުރަމުން އަންނަ އީގަލްސް އޮތީ 6 ވަނާގައެވެ. 7 ވަނާގައި ޔުނައިޓެޑް ވިކްޓްރީ އޮތްއިރު، އެންމެ ފުލުން 8 ވަނަ ލިބެނީ ކްލަބް ވެލެންސިއާ އަށެވެ.