އިނގިރޭސިވިލާތަށް އޮތް އެންމެ ބޮޑު ނުރައްކަލަކީ ޗައިނާކަމަށް, އެގައުމުގެ ކުރީގެ ޗާންސެލަރ އަދި ބޮޑުވަޒީރުކަމަށް ކުރިމަތިލައްވާނެކަން އިއުލާންކުރައްވާފައިވާ ރިޝީ ސުނަކް ވިދާޅުވެއްޖެއެވެ.
ސުނަކް ވިދާޅުވީ، ދާޚިލީގޮތުންނާއި، އަދި އިގުތިސާދީގޮތުން ބެލިކަމުގައިވިޔަސް، އިނގިރޭސިވިލާތަށް އޮތް އެންމެ ބޮޑު ނުރައްކަލަކީ ޗައިނާކަމަށެވެ. އަދި ޗައިނާއިން އަންނަނީ އިނގިރޭސިވިލާތުގައިވެސް އެކިކަހަލަ އިންވެސްޓުތައް ކުރަމުންކަމަށާއި، އަދި އިނގިރޭސިވިލާތުގައި ޗައިނާގެ ގިނަ އަދަދެއްގެ މަސައްކަތްތެރީން ހަރަކާތްތެރިވަމުން އަންނަކަމަށެވެ.
ސުނަކް ވަނީ، ޗައިނާއިން އަންނަނީ އިނގިރޭސިވިލާތުގެ އުފެއްދުންތަކުން "ވައްކަންކުރަމުން" ކަމަށް ތުހުމަތުކުރައްވާފައެވެ.
މީގެ އިތުރުން ސުނަކް ވިދާޅުވީ، ޗައިނާއަކީ ރަޝިޔާއާއެކު ޔޫރަޕަށް އޮތް ބޮޑު ނުރައްކަލެއްކަމަށާއި، އެ ދެ ގައުމުން އަންނަނީ ޔޫރަޕް ބައިބައިކުރަން މަސައްކަތްކުރަމުން ކަމަށެވެ.
ސުނަކް ވިދާޅުވީ، އެ މަނިކުފާނު ބޮޑުވަޒީރަށް ހޮވައިފިނަމަ ފުރަތަމަ ދުވަހުން ފެށިގެން ޗައިނާގެ ވަކިތަކުން އިނގިރޭސިވިލާތް ސަލާމަތްކުރުމަށް މަސައްކަތްޕުޅު ފައްޓަވާނެކަމަށެވެ.
