ބޮޑީ ބިލްޑިންއަކީ ކެރިއަރެއްގެ ގޮތުގައި ކުރިއަށްދާން ރަނގަޅު ކުޅިވަރެއް ކަމަށް ޙުސެއިން ހިމްޔާން ބުނެފިއެވެ.
ހިމްޔާންއަކީ ރާއްޖޭގައި ބޭއްވި އޭޝިއަން ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕްގެ އެތުލެޓިކް ފިޒިކް 175 ސީއެމްގައި ވާދަކޮށް ރަން މެޑަލް ހޯދި އެތުލީޓެވެ. ހިމްޔާން ވަނީ މީގެ ކުރިން މިދިޔަ އަހަރުގެ ވޯލްޑް ޗެމްޕިއަންޝިޕްގައި ވެސް ވާދަކޮށްފައެވެ. އެއީ ޤައުމީ ޓީމުގައި ހިމެނިގެން އޭނާ ވާދަކުރި ފުރަތަމަ މުބާރާތެވެ.
ޒުވާން ހިމްޔާންގެ ނަޒަރުގައި ބޮޑީ ބިލްޑިންއަކީ ފުރުސަތުތަކެއް އޮތް ކުރިއަށް ދެވިދާނެ ކުޅިވަރެކެވެ. އޭނާ ބުނީ އަރަމުން އަންނަ ޒުވާން އެތުލީޓުންނާއި ކުދިިންނަށް ވެސް އޭނާ ބުނަން ބޭނުންވާ ވާހަކައަކީ އެއީ ކަމަށެވެ. ކެރިއަރެއްގެ ގޮތުގައި ކުރިއަށް ދާން ބެލި ނަމަވެސް ބޮޑީ ބިލްޑިންއަކީ ރަނގަޅު ކުޅިވަރެއްކަމަށެވެ.
މިއީ ރަނގަޅަށް މިކަން ކޮށްފިއްޔާ، ކެރިއަރެއް އަސްލު ބިލްޑް އަޕް ކުރެވޭނެ ވަރަށް ރަނގަޅު ސްޕޯޓެއް. ވަރަށް ބޮޑު ފުރުސަތުތަކެއް އެބަ ހުރި، އަދި މި ސަރަހައްދުގައި ނޫނަސް، މި ސަރަހައްދުން ބޭރުގައި ވެސް. އަނެއްހެން އެ މީހަކު އެމީހެއްގެ ކެޕެސިޓީގައި މަސައްކަތްކޮށްފިއްޔާ، މިއީ ވަރަށް ރަނގަޅު މުސްތަގުބަލެއް އޮތް ކުޅިވަރެއް. އެހެންވީމާ މި ކުޅިވަރު ކުރިއެރުވުމަށް އެމީހުން ވެސް އަޅުގަނޑުމެންނާ އެއްފަދައިން މަސައްކަތް ކުރާށޭ. އެމީހުންގެ އެންމެ ރަނގަޅު ސަޕޯޓު ހަމަ ދޭށޭޙުސެއިން ހިމްޔާން / އެތުލެޓިކް ފިޒިކް 175 ސީއެމް ކެޓަގަރީން ރަން މެޑަލް ހޯދި އެތުލީޓު
ޖުމުލަ 15 އެތުލީޓުން ވާދަކުރި ކެޓަގަރީގެ އެއްވަނަ ހިމްޔާން ހޯދީ އެހެން ހުރިހާ ޤައުމުތަކެއްގެ އެތުލީޓުން ފަހަތަށް ޖައްސާލުމަށްފަހުއެވެ. ފައިނަލްގައި އޭނާ ވާދަކުރީ އިރާގު، އިންޑޮނޭޝިއާ، ވިއެޓްނާމް، އުޒްބެކިސްތާން، އިންޑިއާ އަދި އީރާންގެ އެތުލީޓުންނާއެވެ. މިއީ އެމުބާރާތުގައި ރާއްޖެއިން ހޯދި ތިންވަނަ ރަން މެޑަލްއެވެ.
ރަން މެޑަލް ކާމިޔާބުކުރެވުމުން އެކަން ހިމްޔާން ސިފަކުރީ އޭނާއާއި ރާއްޖޭގެ އެހެން އެތުލީޓުންގެ އިތުރުން މުޅި ޤައުމަށް ލިބުނު ކާމިޔާބެއްގެ ގޮތުގައެވެ.
ރާއްޖޭގައި ބޮޑީ ބިލްޑިންގެ ބައިނަލްއަޤުވާމީ މުބާރާތެއް ބާއްވާތީ، އެހެން އަހަރުތަކާ ޚިލާފަށް މިއަހަރުގެ ޓްރެއިނިން އާއި ޑައިޓް ވެސް އުނދަގޫކަން ފާހަގަކުރަމުން ހިމްޔާން ބުނީ، ރަނގަޅު ކާމިޔާބެއް ހޯދުނީ އެހެންވެ ކަމަށެވެ. އެގޮތުން އައު ކޯޗާއެކު ޓްރެއިނިން ޝެޑިއުލަށް ބޮޑު ބަދަލެއް އައިކަން ފާހަގަކޮށް ހިމްޔާން ބުނީ، ކޮންމެ ދުވަހަކުވެސް ދެ ދަންފަޅިއަށް ބަހައިގެން ޓްރެއިނިން ސެޝަންތައް ކުރިއަށް ގެންދިޔަ ކަމަށެވެ. އެހެންކަމުން މިފަހަރުގެ ޓްރެއިނިން އަކީ މިހާތަނަށް ކުރިއަށް ގެންދިޔަ އެންމެ އުނދަގޫ، އަދި އެންމެ ކާމިޔާބު ޓްރެއިނިން ކަމަށް ވެސް އޭނާ ބުންޏެވެ.
މީގެ އިތުރުން ހިމްޔާން ބުނީ ދިވެހި އެތުލީޓުންނަށް އެންމެ އުނދަގޫ ވަނީ ހަށިގަނޑު އުފެދުމުގައި ކަމަށެވެ. އެކަން އެގޮތަށް އޮތް ނަމަވެސް، ފައިނަލް ފިނިޝިން ރަނގަޅަށް ނިންމާލެވޭ ނަމަ، ދިވެހި އެތުލީޓުންނާ އެހެން ޤައުމުތަކުގެ އެތުލީޓުންނާމެދު މާބޮޑު ތަފާތެއް ނޯންނާނެ ކަމަށް ހިމްޔާން ބުންޏެވެ. އަދި މިއަހަރުގެ މުބާރާތުގައި އެކަން ފެނުނުކަމަށް ވެސް އޭނާ ވަނީ ފާހަގަކޮށްފައެވެ.
ހިމްޔާން ބުނީ މިއަހަރުގެ މުބާރާތުގައި ލިބުނު ރަން މެޑަލްއާއެކު ކުރިއަށް އޮތް މުބާރާތުގައި ރަނގަޅު ނަތީޖާއެއް ނެރެވޭނެ ކަމަށް އުންމީދުކުރެވޭ ކަމަށެވެ. އެ މުބާރާތަށް ތައްޔާރުވުމުގެ ގޮތުން ކުރިއަށް ގެންދަން ޖެހޭ ޓްރެއިނިންތަކާއި ޑައިޓް ކުރިއަށް ގެންދާނެ ގޮތް ޕްލޭން ކުރެވިފައިވާ ކަމަށާއި ރާއްޖޭގައި ބޭއްވި ބޮޑީ ބިލްޑިންގެ މުބާރާތަށްފަހު، ކުރިއަށް އޮތް މުބާރާތުގެ ޓްރެއިނިންތައް ފެށިގެން ދާނެ ކަމަށް ހިމްޔާން ބުންޏެވެ.
