މިހާރު ކުރިއަށްދާ އެފްއޭއެމް ދެވަނަ ޑިވިޝަން ފުޓްބޯޅަ މުބާރާތުގެ އެއްވަނަ ގްރޫޕުގައި ބުރު ސްޕޯޓްސް ކްލަބު އަދި ބިސްބުރު ސްޕޯޓްސް ކްލަބުވެސް ކާމިޔާބުކޮށްފިއެވެ.

މުބާރާތުގައި އިއްޔެ ހަވީރު ވާދަކުރީ ދިވެހި ސިފައިންގެ ކްލަބާއި ބިސްބުރެވެ. މި މެޗު 2-1ން ކާމިޔާބުކުރީ ބިސްބުރެވެ. މެޗުގައި ފުރަތަމަ ލަނޑުޖަހާ ލީޑު ނެގީ ސިފައިންގެ ޓީމުންނެވެ. ފުރަތަމަ ހާފުގެ 38 ވަނަ މިނެޓުގައި ސިފައިންގެ ޓީމަށް ލީޑު ނަގައިދިނީ އަހުމަދު ފިރާޝްއެވެ. ނަމަވެސް ފުރަތަމަ ހާފުގެ ފަހު މިނެޓުގައި ބިދޭސީ މިޑްފީލްޑަރު މަހަމަތް އެކިއަން ބަރްކާ ވަނީ ބިސްބުރަށް ނަތީޖާ ހަމަހަމަ ކޮށްދީފައެވެ.

ބިސްބުރުގެ މޮޅުވި ލަނޑު އެޓީމުން ޖެހީ ދެވަނަ ހާފުގައެވެ. މެޗުގެ 74 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ބިދޭސީ މިޑްފީލްޑަރު އެކިއަންއެވެ. މުބާރާތުގައި ބިސްބުރު ކުޅުނު ފުރަތަމަ މެޗުން ބަލިވި ނަމަވެސް އެޓީމު ވަނީ ދެވަނަ މެޗު ކާމިޔާބުކޮށްފައެވެ.

މުބާރާތުގައި ރޭގެ މެޗުގައި ބައްދަލުކުރީ ބުރު ސްޕޯޓްސް ކްލަބާއި ކެޕިޓަލް ސިޓީ ސްޕޯޓްސް ކްލަބެވެ. މި މެޗު ބުރުން ކާމިޔާބުކުރީ 5-0ންނެވެ. މެޗުގެ ފުރަތަމަ ހާފުގައި ބުރުން ދެލަނޑު ކާމިޔާބުކުރިއެވެ. ފުރަތަމަ ލަނޑަކީ ކެޕިޓަލް ސިޓީގެ މުސްތަގީމް މޫސާ އަތުން ބައިކޮޅަށް ވަން ލަނޑެކެވެ. ފުރަތަމަ ހާފު ނިމެނިކޮށް ބުރަށް ލީޑު ފުޅާކޮށްދިނީ މިސްރުގެ މިޑްފީލްޑަރު އަހުމަދު މުހައްމަދު ގަބާލާ (ބޫގީ)އެވެ.

ދެވަނަ ހާފުގައި ބުރުގެ މުހައްމަދު ތަސްމީން ދެލަނޑު ޖެހިއެވެ. ބުރުގެ ފަހު ލަނޑު ކާމިޔާބުކޮށްދިނީ އުޒްބެކިސްތާނުގެ މިޑްފީލްޑަރު މިރްޖާލޯލް ކަސީމޯވްއެވެ.