ބާސެލޯނާއާއެކު ހަދާފައިވާ މުއްދަތު ހަމަވުމުން ކުލަބުން ދޫކޮށްލި ބްރެޒިލްގެ ތަޖުރިބާކާރު ޑިފެންޑަރު ޑެނީ އަލްވޭސްގެ ނުރުހުން ބާސާއަށް އަމާޒުކޮށްފިއެވެ.
މީގެ ކުރިންވެސް ބާސާއަށް ކުޅެފައިވާ ޑެނީ އަލްވޭސް ދެވަނަ ފަހަރަށް ބާސާއަށް ގުޅުނީ މިދިޔަ އަހަރުގެ ނޮވެމްބަރު މަހުއެވެ. އޭނާ ގެނައުމާ ގުޅޭގޮތުން ބާސާގެ ކޯޗު ޒަވީ ހެނާންޑޭޒް އޭރު ބުނީ، ޒުވާން ކުޅުންތެރިންނާއެކު ބާސާ ކުރިއަރުވަން ބޭނުންވާއިރު، އެ ކުޅުންތެރިންނާއެކު ތަޖުރިބާކާރު ކުޅުންތެރިއަކު ހުރުން މުހިންމުކަމަށެވެ. ޒަވީ ބުނިގޮތުގައި އުމުރުން ދުވަސްވުމަކީ ފުޓުބޯޅަ ކުޅުމަށް އޮތް މައްސަލެއް ނޫނެވެ. އަލްވޭސް ބާސާއަށް ގެނައީ ޒަވީގެ އެދުމުގެ މަތިން ކަމަށްވެސް އޭނާ ބުނެފައިވެއެވެ.
ބާސާއާއެކު އަލްވޭސް ހަދާފައިވާ އެއްބަސްވުމުގެ މުއްދަތު މިދިޔަ ޖޫން މަހުގެ ނިޔަލަށް ހަމަވުމުން ބާސާއިން ނިންމީ އޭނާ ދޫކޮށްލާށެވެ. އަލްވޭސް ވަނީ ބާސާއަށް ބަދަލުވެ އެ ޓީމުގައި މޮޅު ކުޅުމެއް ދައްކާފައެވެ. އޭނާ ވަނީ އެ ޓީމަށް 17 މެޗު ކުޅެދީފައެވެ. މީގެ ތެރެއިން ފުރަތަމަ 11ގައި ހިމެނިގެން އޭނާ ވަނީ 16 މެޗު ކުޅެފައެވެ.
އަލްވޭސް ބުނީ އޭނާ ބާސާ ދޫކޮށްލީ ދެރަވެފައި ހުރެގެން ނޫންކަމަށެވެ. ބާސާ ދޫކޮށްލީ ދެ ވަނަ ފަހަރަށް އެ ޓީމަށް އަންނަން ޖެހުމުގެ އުފަލާއެކުކަމަށެވެ. އޭނާ ބުނި ގޮތުގައި އޭނާ ކުލަބް ދޫކޮށްލަން ޖެހުނު ގޮތަކީ އޭނާ އެހާ ގަޔާވާ ގޮތެއް ނޫނެވެ. އަލްވޭސް ބުނީ ދެވަނަ ފަހަރަށް ބާސާއަށް ބަދަލުވެ، ކަންކަން ނުފޮރުވައި ކުރަން ބޭނުންވާކަން ސާބިތުކޮށްދިންކަމަށެވެ. އަލްވޭސް ބުނީ ބާސާއަކީ ކުލަބުގެ ތާރީޚުގައި ކަންކަން ކޮށްދީފައިވާ މީހުންނަށް ބަލާ ކުލަބެއް ނޫންކަމަށެވެ. އަދި އެ މީހުންނާމެދު އަޅާލާ ކުލަބެއް ނޫންކަމަށެވެ.
މީގެ އިތުރުން އޭނާ ވަނީ ދެވަނަ ފަހަރަށް ބާސާއަށް ކުޅުމުގެ ފުރުސަތު ދިން ކަމަށްޓަކައި، ކުލަބުގެ ރައީސް ޖޯން ލަޕޯޓާއާއި ކޯޗު ޒަވީއަށް ޝުކުރު އަދާކޮށްފައެވެ. ޒަވީ ވަނީ ބާސާގެ ކޯޗިންގ ސްޓާފުންނާއި، މުވައްޒަފުން އަދި ސަޕޯޓާރުންނަށް ޝުކުރު އަދާކޮށްފައެވެ. އޭނާ އިތުރަށް ބުނީ އަބަދުވެސް އޭނާގެ އުންމީދަކީ ބާސާ ފުޓުބޯޅައިގެ އެންމެ އުހުގައި އޮންނަ ތަން ދެކުން ކަމަށެވެ.
އަލްވޭސް ވަނީ ބާސާއެކު ބޮޑެތި ކާމިޔާބީތަކެއް ހޯދާފައެވެ. އެގޮތުން އޭޭނާ ވަނީ އެ ޓީމާއެކު 26 ތައްޓެއް ހޯދާފައެވެ.
