މެންޗެސްޓަރ ޔުނައިޓެޑަށް ކުޅެމުން އަންނަ ޕޯޗުގަލްގެ ކްރިސްޓިއާނޯ ރޮނާލްޑޯ އުފާކޮށްދޭނެ ގޮތެއް ނޭނގޭ ކަމަށް ޔުނައިޓެޑުގެ ކޯޗު އެރިކް ޓެން ހާގް ބުނެފިއެވެ.

ރޮނާލްޑޯ ވަނީ ޔުނައިޓެޑް ދޫކޮށްލަން ބޭނުންވާކަން އެ ކުލަބަށް އަންގާފައެވެ. އޭގެ ފަހުން ޔުނައިޓެޑުގެ އެއްވެސް ފަރިތަކުރުމެއްގައި އޭނާ ބައިވެެރިވެފައެއް ނުވެއެވެ. ފަރިތަކުރުންތަކަށް ރޮނާލްޑޯ ހާޒިރުނުވަނީ އަމިއްލަ ސަބަބުތަކަކާ ހެދި ކަމަށް ބުނެއެވެ.

މިއަޑުތައް ފެތެރެމުން ދަނިކޮށް ޔުނައިޓެޑުގެ އައު ކޯޗު ޓެން ހާގް ބުނީ، ޔުނައިޓެޑުން ރޮނާލްޑޯ ވިއްކާ ނުލާނެކަމަށެވެ. އޭނާ ބުނީ ޔުނައިޓެޑުގެ ޕްލޭންގައި ރޮނާލްޑޯ އަކީ ހިމެނޭ ކުޅުންތެރިއެއް ކަމަށެވެ. އޭނާ ބުނީ ކުރިއަށް އޮތް ސީޒަނަށް ޔުނައިޓެޑުން ތައްޔާރުވާނީ ރޮނާލްޑޯއާ އެކު ކަމަށެވެ. މީގެ އިތުރުން އޭނާ ބުނީ ރޮނާލްޑޯ އުފާކޮށްދޭނެ ވަކި ގޮތެއް އޭނާއަށް ނޭނގޭ ކަމަށާއި، ރޮނާލްޑޯއާއެކު މަަސައްކަތްކޮށްގެން ކުރިއަށް ދާން އޭނާ ބޭނުންވާ ކަމަށެވެ.

މީގެ އިތުރުން ޓެން ހާގް ބުނީ އެ މައްސަލަ ދިމާވުމުގެ ކުރިން ރޮނާލްޑޯއާއި އޭނާއާ ދެމެދު ވާހަކަ ދެކެވުނު ކަމަށެވެ. އޭނާ ފާހަގަކުރި ގޮތުގައި ރޮނާލްޑޯއާއި ދެމެދު ދެކެވުނު ވާހަކަތަކަކީ ރަނގަޅު ވާހަކަތަކެއް ކަމަށެވެ. އިތުރަށް އޭނާ ބުނީ ޔުނައިޓެޑް ދޫކޮށްލަން ބޭނުންވާކަން ރޮނާލްޑޯ އެއްވެސް އިރެއްގައި އޭނާ ގާތު ނުބުނާކަމަށެވެ. ޓެން ހާގް ބުނީ އޭނާ ކުރިއަށް ދާން ބޭނުންވަނީ އެންމެން ގުޅިގެން އެކުގައި ކަމަށެވެ.

ޔުވެންޓަސް ދޫކޮށް ރޮނާލްޑޯ ޔުނައިޓެޑަށް ބަދަލުވީ 2021 ވަނަ އަހަރުއެވެ. މިއީ ރޮނާލްޑޯ ޔުނައިޓެޑަށް ކުޅޭ ދެ ވަނަ ފަހަރެވެ. އެންމެ ފުރަތަމަ ރޮނާލްޑޯ ޔުނައިޓެޑަށް ބަދަލުވީ 2003 ވަނަ އަހަރުއެވެ. އޭގެ ފަހުން 2009 ވަނަ އަހަރު އޭނާ ބަދަލުވީ ރެއާލް މެޑްރިޑް އަށެވެ. ދެ ވަނަ ފަހަރަށް ޔުނައިޓެޑް އަށް ބަދަލުވެ ރޮނާލްޑޯ ވަނީ އެ ޓީމަށް ކުޅެދިން 38 މެޗުގައި 24 ލަނޑު ޖަހާފައެވެ.