އަވައްޓެރި ގައުމުތަކުން ގަތަރާ ގުޅުން ކަނޑާލާ އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ކާބޯތަކެއްޗަށް ޖެހިފައިވާ ގަތަރުގެ ރައްޔިތުންނަށް ބޭނުންވާ ގެރިކިރު ފަސޭހައިން ލިބޭނެ ގޮތް ހެދުމަށް ގަތަރުގެ ވިޔަފާރިވެރިޔަކު ހަތަރުހާސް ގެރި މަތިންދާ ބޯޓުގައި އެ ގައުމަށް ގެންދިއުމުގެ މަސައްކަތް ފަށައިފިއެވެ.

ޕަވަރ އިންޓަނޭޝަނަލް ހޯލްޑިންގެ ޗެއަރމަން މުއުތާޒް އަލް ޚައްޔާތު ރާވާފައިވަނީ މި ހަތަރުހާސް ގެރި ފަސްދޮޅަސް ފްލައިޓްގައި ގަތަރަށް އެތެރެ ކުރުމަށެވެ. މިއީ އެއްގައުމުން އަނެއް ގައުމަށް ގެރިބަކަރި އުފުލުމަށް ހިންގޭ އެންމެ ބޮޑު އޮޕަރޭޝަނަށް ވެގެންދާނެ ކަމަށް ޚަބަރުތަކުގައި ވެއެވެ.

ސައުދީ އަރަބިއްޔާއާއި، ބަހްރޭން، އަދި ޔުނައިޓެޑް އެރަބް އެމިރޭޓްސް އިން ގަތަރަކީ ޓެރަރިޒަމް އަށް ވާގިވެރިވާ ގައުމެއް ކަމަށް ބުނެ އެގައުމާ އޮންނަ ގުޅުން ކަނޑާލީ ޖޫން މަހުގެ 5 ވަނަ ދުވަހުއެވެ. އަދި އޭގެ ފަހުން ވައިގެ މަގުންނާއި އެއްގަމު އަދި ކަނޑުގެ މަގުން ގަތަރަށް ދަތުރުކުރެވޭނެ މަގުތައް އެގައުމުތަކުން ވަނީ ބަންދުކޮށްފައެވެ.

މީގެ ހަފްތާހެއްހާ ދުވަސް ކުރިއަށް ޖެހިލާއިރު ގަތަރުގެ އާބާދީއަށް ބޭނުންވާ ކިރުގެ ބާވަތްތައް މައިގަނޑު ގޮތެއްގައި ގަތަރަށް އެތެރެ ކުރަމުން ދިޔައީ ސައުދީންނެވެ.

ގަތަރާ ގަލްފްގެ ބައެއް ގައުމުތަކާ ކުރިމަތިވެފައިވާ މައްސަލަ އާ ގުޅިގެން ސޯމާލިއާއިން ގެންގުޅެމުންދަނީ ވަކި ފަރާތަކަށް ނުޖެހޭ ސިޔާސަތެކެވެ. ނަމަވެސް، ގަތަރަށް ވައިގެ މަގުތައް އަވައްޓެރި ގައުމުތަކުން ބަންދު ކުރުމާއެކު ސޯމާލިއާއިން ވަނީ އެގައުމުގެ ވައިގެ މަގު ބޭނުން ކުރުމުގެ ފުރުސަތު ގަތަރަށް ތަނަވަސް ކޮށްދީފައެވެ.

ގަތަރާއި ގަލްފްގެ އަރަބި ގައުމުތަކާއި އުފެދުނު މައްސަލައެއްގައި ގަތަރާ ކުއްލިއަކަށް ގުޅުން ކަނޑާލި ގައުމުތަކުގެ ތެރޭގައި ރާއްޖެ ހިމެނެއެވެ.

ނަމަވެސް ގުޅުން ކަނޑާލުމުގެ ސަބަބުން ގަތަރަށް އައު ރަހުމަތްތެރިންނާއި، ކާބޯތަކެތި ވިއްކާނެ އައު ބައިވެރިން ހޯދުމަށްވަނީ މަޖުބޫރު ވެފައެވެ.

މި ހަފްތާގެ އާދިއްތަ ދުވަހު އީރާނުން ވަނީ ފަސް ފްލައިޓު ފުރާ ތަރުކާރީ ފޮނުވާފައެވެ.

ތުރުކީންވެސް ވަނީ ކިރުގެ ބާވަތްތަކާއި ކާބޯތަކެތި ގަތަރަށް ފޮނުވާފައެވެ.

މޮރޮކޯއިންވެސް ގެންދަނީ ކާބޯތަކެތީގެ ދަތިކަން ފިލުވުމަށް ގަތަރަށް އެހީވަމުންނެވެ.