ހަ ކުޅުންތެރިއަކަށް ބާސެލޯނާގައި ފުރުސަތެއް ނެތް ކަމަށް އެ ކުލަބުގެ ކޯޗު ޒަވީ ހެނާންޑޭޒް ބުނެފިއެވެ.
ރިޕޯޓުތައް ބުނާ ގޮތުން ޒަވީ މިހާރު ވަނީ އެ ކުޅުންތެރިންނަށް އެކަން އަންގައި، ކުޅޭނެ އެހެން ކުލަބެއް ހޯދުމަށް ބުނެފައެވެ. ބާސާއިން ޕްރީ-ސީޒަން ފަށާއިރު ވެސް އެ ޓީމުގެ ބައެއް ކުޅުންތެރިންގެ މުސްތަޤުބަލާމެދު އަދިވެސް އޮތީ ސުވާލު އުފެދިފައެވެ. މީގެ އިތުރުން ރިޕޯޓުތައް ބުނާ ގޮތުގައި ބާސާއިން އެ ކުޅުންތެރިންތައް ދޫކޮށްލަނީ، ކުރިއަށް އޮތް ސީޒަނަށް ފަސް ކުޅުންތެރިޔަކު ހޯދަން ބޭނުންވާތީއެވެ.
ރިޕޯޓުތަކުގައި ވާ ގޮތުން ފުރުސަތެއް ނެތް ކަމަށް ޒަވީ އެންގި ކުޅުންތެރިންނަކީ ރިކީ ޕޫޖް، ނެޓޯ، އޮސްކާ، ލެންގުލެޓް، އުމްޓިޓީ އަދި މޫސާ ވޭގްއެވެ. އަދި ޓްރާންސްފާ މާކެޓުގައި މި ކުޅުންތެރިން ވިއްކާލަން ބޭނުންވާ ކަމަށް ވެސް އަންގާފައިވާ ކަމަށް ރިޕޯޓުތަކުގައިވެއެވެ.
މީގެ ތެރެއިން ލެންގުލެޓް ވަނީ ޓޮޓެންހަމަށް ބަދަލުވާން ނިންމާފައިކަމަށް ރިޕޯޓުތައް ބުނެއެވެ. ނަމަވެސް އުމްޓިޓީ އާއި ނެޓޯއަށް ކުލަބެއް ހޯދުމުގައި ދަތިތަކާ ދިމާވެދާނެ ކަމަށް ރިޕޯޓުތަކުގައިވެއެވެ. ސަަބަބަކީ މީގެ ކުރިން ވެސް މި ދެ ކުޅުންތެރިން ބާސާ ދޫކޮށް އެހެން ޓީމަކަށް ބަދަލުވުމަށް މަސައްކަތް ކުރި ނަމަވެސް، އެކަން ކާމިޔާބުވެފައި ނުވާތީއެވެ. ގިނަ ދުވަސްތަކެއް ވަންދެން އަނިޔާގައި ހުރުމަށްފަހު މޫސާ ވޭގް އަނިޔާއިން ރަނގަޅުވީ ދާދި ފަހުންނެވެ. އެހެންކަމުން ކުލަބުތަކުން އޭނާ ގެންދިޔުމުގައި ރިސްކެއް ނުނަގާނެކަމަށް ރިޕޯޓުތައް ބުނެއެވެ.
އަންނަ ސީޒަނަށް ޓީމު ވަރުގަދަ ކުރުމުގެ ގޮތުން ބާސާއިން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ބަޔާން މިއުނިކަށް ކުޅެމުން އަންނަ ޕޮލޭންޑުގެ ރޮބާޓް ލެވަންޑޯސްކީ ބާސާއަށް ގުޅުމަކީ ވަރަށް ގާތް ކަމެއް ކަމަށް މީޑިއާ ރިޕޯޓުތައް ބުނެއެވެ.
