ދިވެހި ފައިސާގެ ނިޝާނުގެ ގޮތުގައި ބޭނުން ކުރާނެ ރަސްމީ ނިޝާން ތައާރަފު ކޮށްފިއެވެ.

މި ނިޝާން ތައާރަފު ކޮށްފައިވަނީ މޯލްޑިވްސް މަނިޓަރީ އޮތޯރިޓީގައި އާދީއްތަ ދުވަހު ބޭއްވި ރަސްމިއްޔާތެއްގައެވެ. ނިޝާން ތައާރަފު ކޮށްދެއްވީ މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާއެވެ.

އެމްއެމްއޭއިން މައުލޫމާތު ދޭ ގޮތުގައި އަލަށް ތައާރަފު ކުރި ލޯގޯ ޑިޒައިން ކުރީ މ.ސްޕޮޓްލައިޓް، ހުސެއިން ސުޖާއުއެވެ. އޭނާގެ ޑިޒައިންއަކީ މިދިޔަ އަހަރު އެމްއެމްއޭ އިން ހުޅުވާލި ފުރުސަތުގެ ތެރެއިން ލިބުނު 70 ހުށަހެޅުމުގެ ތެރެއިން ފަންނީ ޖަޖުންގެ ޕެނަލުން ހޮވި ޑިޒައިން އެވެ.

ދިވެހި ފައިސާގެ ނިޝާނުން ރަމްޒުކޮށްދެނީ ތާނައިގެ "ރ" އެވެ. މި ނިޝާނުގައި "ރ" އަކުރުގައި ގައި ކައްޗަށް އިތުރު ރޮނގުބުރިއެއް އިނދެއެވެ.

މި ނިޝާން ތައާރަފު ކުރުމަށް ބޭއްވި ރަސްމިއްޔާތުގައި މިނިސްޓަރ ޝައުނާ ވިދާޅުވީ، ދިވެހި ފައިސާގެ ނިޝާނުގެ ގޮތުގައި ތާނަ އަކުރެއް ބޭނުން ކުރުމަކީ ރާއްޖެއަށް ލިބުނު ފަޚުރެއް ކަމަށެވެ. އަދި މި ނިޝާން ވީހާ ވެސް ފަސޭހައިން ބޭނުން ކުރެވޭނެ ގޮތްތައް ފަހިކުރުން ވަރަށް މުހިއްމު ކަމަށާއި އެކަން ކުރުމަށް ޑިޖިޓަލް ޕްލެޓްފޯމުތަކުގައި ވެސް ނިޝާން ބޭނުން ކުރެވޭނެ ގޮތްތައް ހުރުން މުހިންމު ކަމުގައި މިނިސްޓަރ ވިދާޅުވިއެވެ.

މީގެ އިތުރުން ފައިސާގެ ރަސްމީ ނިޝާނެއް މިހާތަނަށް ކަނޑައަޅައިފައިވަނީ ދުނިޔޭގެ 50 އެއްހާ ޤައުމުންކަން ފާހަގަ ކުރައްވައި ޝައުނާ ވަނީ އޭގެ ތެރޭގައި ދިވެހި ރާއްޖެ ހިމެނިގެން ދިއުމަކީ ވެސް ލިބޭ އިތުރު ފަޚުރެއް ކަމަށެވެ.

ދިވެހި ފައިސާގެ އާ ނިޝާނަށް އާއްމުން ހޭލުންތެރި ކުރުމަށާއި އެ ނިޝާން ބޭނުންކުރާ ވަރު އިތުރު ކުރުމަށް ސަރުކާރުގެ އިދާރާތަކާ ގުޅިގެން މަސައްކަތް ކުރަމުންދާ ކަމަށް އެމްއެމްއޭގެ ގަވަރުނަރ އަލީ ހާޝިމް ވިދާޅުވިއެވެ. މި ނިޝާނަލީ ބައިނަލްއަގުވާމީ ފެންވަރުގައި ބަލައިގަންނަ ނިޝާނަކަށް ހެދުމުގެ މަސައްކަތް ވެސް ކުރަމުން އަންނަ ކަމަށް ގަވަރުނަރ ވިދާޅުވިއެވެ.

މި ނިޝާން ކުރިއަށް އޮތްތަނުގައި ޗާޕު ކުރާ ފައިސާތަކުގައި ވެސް ހިމަނާނެ ކަމަށް އެމްއެމްއޭއިން ބުނެއެވެ.