ރަޝިއާގެ އަސްކަރީ ކާގޯ ފްލައިޓެއް ވެއްޓި ހަތަރު މީހުން މަރުވެއްޖެއެވެ.
ރޮއިޓަރސްގައި ރިޕޯޓުކޮށްފައިވާގޮތުން ވެއްޓިފައި ވަނީ އިލްޔުޝިން އައިއެލް-76 އަސްކަރީ ކާގޯ ފްލައިޓެވެ. ފްލައިޓް ވެއްޓި ރޯވެފައި ވަނީ ރަޝިއާގެ ހުޅަނގުގެ ސިޓީއެއް ކަމަށްވާ ރްޔަޒަން ކައިރިން ހުކުރު ދުވަހުއެވެ.
ރަޝިއާގެ ކަމާގުޅޭ އިދާރާތަކައި ހަވާލާދީ އާރްއައިއޭ ނިއުސް އެޖެންސީން ވަނީ ފްލްއިޓްގައި ތިބި ނުވަ މީހުންގެ ތެރެއިން ހަތަރު މީހުން މަރުވެފައިވާކަމަށް ރިޕޯޓުކޮށްފައެވެ. ފަސް މީހުންނަށް ލިބުނު އަނިޔާތަކަށް ފަރުވާދިނުމަށް ހޮސްޕިޓަލްގައި އެޑްމިޓްކޮށްފައިވާކަމަށް އާރްއައިއޭ އިން ވަނީ ރިޕޯޓުކޮށްފައެވެ.
ރަޝިއާގެ ޑިފެންސް މިނިސްޓްރީއާ ހަވާލާދީ އިންޓަފެކްސް ނިއުސް އެޖެންސީން ރިޕޯޓުކޮށްފައިވާގޮތުން ފްލައިޓް ވެއްޓިފައި ވަނީ އިންޖީނަށް ދިމާވި މައްސަލައަކާ ގުޅިގެންނެވެ.
މިހާދިސާގައި މަރުވި މީހުންގެ ތަފްސީލެއް މިނިސްޓްރީން ހާމަކޮށްފައެއް ނުވެއެވެ.
