ހައްޖު މަހުގެ ފުރަތަމަ ދިހަ ދުވަހަކީ މާތްﷲ މި ދުނިޔޭގައި ލައްވާފައިވާ އެންމެ މާތް ދުވަސްތައް ކަމަށް ހުކުރު ޚުތުބާގައި ބުނެފިއެވެ.
''ހައްޖު މަހުގެ ދިހަ ދުވަހުގެ މާތްކަން'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ ކީރިތި ރަސޫލާ صَلَّى اللّٰهُ عَلَيْهِ وَسَلَّمَ އަމުރު ކުރައްވަނީ މި ދުވަސްތަކުގައި ތަކްބީރާއި ތަޙްމީދާއި ތަހްލީލާއި ތަސްބީޙަ ކިޔުން ގިނަ ކުރުމަށެވެ. އަދި މި ދުވަސްތަކުގެ ތެރޭގައި ކުރެވެން އޮތް ސާލިހު އަމަލުތަކުގެ ތެރޭގައި ރޯދަހިފުން ހިމެނޭ ކަމަށް ޚުތުބާގައި ބުނެފައިވެއެވެ.
ހައްޖުވެރިޔާ ނޫން މީހާ އަރަފާތު ދުވަހު ރޯދަ ހިފުމަކީ ވޭތުވެދިޔަ އަހަރާއި ކުރިއަތް އޮތް އަހަރުގެ ފާފަތައް ފުއްސަވާ ކަމެއް ކަމަށާއި ޢާޝޫރާ ދުވަހު ރޯދަ ހިފުމަކީ ވޭތުވެދިޔަ އަހަރުގެ ފާފަ ފުއްސަވާ ކަމެއް ކަމަށް ޚުތުބާގައިވެއެވެ. މި ދިހަ ދުވަހު ކުރުން އިތުރުވެގެންވާ ހެޔޮ އަމަލުތަކުގެ ތެރޭގައި މާތް ﷲ އަށް ޒިކުރު ކުރުން ހިމެނެއެވެ. މާތް ﷲ ގެ ހަޟްރަތުގައި އެންމެ ލޮބުވެތިކަން ބޮޑު އަމަލަކީ ޒިކުރު ކުރުމެވެ. އެއީ މުއުމިން އަޅާ އަތުގައިވާ އެންމެ ވަރުގަދަ ހަތިޔާރެވެ.
ޒިކުރު ކުރާ މީހާ ކުފުރުގެ ނުބައި އަނދަވަޅަށް ވެއްޓުމުންނާއި ޝައިތާނާގެ މަޅީގައި ޖެހުމުންނާއި ނަރަކައިގެ ގިނަ ހިލަތަކުގެ ހޫނުން ރައްކާތެރިކޮށްދެއްވާނެއެވެ. މާތް ﷲ އަށް ޒިކުރު ކުރާ މީހާގެ މައްޗަށް މާތް ﷲ ގެ ރަހުމަތާއި މަލާއިކަތުންގެ ހެޔޮ ދުޢާ ލިބިގެންވާ ކަމަށް ޚުތުބާގައި ބުނެފައިވެއެވެ.
ހައްޖު މަހުގެ ފުރަތަމަ ދިހަ ދުވަހުގެ މާތް ކަމުގެ ތެރޭގައި މާތް ﷲ މި މަތިވެރި އިސްލާމްދީން ފުރިހަމަކޮށްދެއްވުން ވެއެވެ. މި ދީން ފުރިހަމަވުމުގެ ސަބަބުން ދީނުގެ އަހުލުވެރިންނަށް ފުރިހަމަކަން ލިބޭކަމުގައިވެސް ޚުތުބާގައި ބުނެފައިވެއެވެ.
