ސްރީލަންކާގެ ވެރިރަށް ކޮލޮމްބޯގެ އެކި ހިސާބުތަކުން 10 ގަޑިއިރަށް ފެން ކަނޑާލާނެކަމަށް އެގައުމުގެ މީޑިއާތަކުން ރިޕޯޓުކޮށްފިއެވެ.
ލަންކާގެ މީޑިއާތަކުން ރިޕޯޓުކޮށްފައިވާގޮތުގައި، އަންނަ ހޮނިހިރު ދުވަހާއި އާދިއްތަ ދުވަހު ފެން ކަނޑާލުމަށް ވަނީ ހަމަޖެހިފައެވެ. އެގޮތުން ހޮނިހިރު ދުވަހުގޭ ރޭ 10:00ން އާދިއްތަ ދުވަހުގެ ހެނދުނު 08:00ށް ފެނުގެ ޚިދުމަތް ނުލިބޭނެކަމަށް މީޑިއާ ރިޕޯޓުތައް ބުނެއެވެ.
ފެން ކަނޑާލުމަށް ހަމަޖެހިފައިވަނީ ކޮންމެހެން ކުރަން ޖެހޭ މަރާމާތުގެ މަސައްކަތެއް ކުރުމަށް ކަމަށް، އެގައުމުގެ ނެޝަލަން ވޯޓަރ ސަޕްލައި އެންޑް ޑްރެއިނޭޖް އެންޑް ބޯޑް އިން ބުނެއެވެ. އެހެން ކަމުން ބޭނުންވާ ވަރަށް ފެން ނެގުމަށް ވަނީ އިލްތިމާސްކޮށްފައެވެ. އަދި ފެން ބޭނުންކުރާއިރު އިސްރާފު ނުވާނެހެން ފެން ބޭނުން ކުރުމަށްވެސް ވަނީ އިލްތިމާސްކޮށްފައެވެ.
ލަންކާއަށް މިހާރު ކުރިމަތިވެފައިވާ އިގުތިސާދީ ކާރިސާއާއެކު އެގައުމުގެ އާންމު ރައްޔިތުންނަށް ވަނީ ގިނަ ގޮންޖެހުންތަކަކާ ކުރިމަތިލާންޖެހިފައެވެ. ގޭހަށް ޚަރަދުކުރާނެ ފައިސާނެތި، ލަންކާގެ ގިނަ ސަރަހައްދުތަކަށް ކަރަންޓު ނުލިބި، ދުވާލުގެ ދެބައިކުޅަ އެއްބަޔަށްވުރެ ގިނަ ވަގުތު އާންމުންނަށް ވަނީ ކަރަންޓާނުލައި އުޅެންޖެހިފައެވެ.
މީގެ އިތުރުން ތެލަށް ޚަރަދުކުރާނެ ފައިސާނެތި، ކައްކާ ތެލާއި ޕެޓްރޯލް ލިބުމުގެ ދަތިތަކާވެސް އެގައުމަށް ވަނީ ކުރިމަތިލާންޖެހިފައެވެ. ތެޔޮ ގަތުމަށް ތެޔޮ ވިއްކާ ތަންތަނުގައި އާންމު ރައްޔިތުން ކިއުގައި ޖެހިފައި ތިބުމަކީ މިހާރު އެގައުމުގައި އާންމު މަންޒަރެކެވެ.
ގައުމަށް ދިމާވެފައިވާ އިގުތިސާދީ ކާރިސާއާއެކު ގައުމުގައި ކާބޯތަކެތީގެ ކާރިސާއެއް ކުރިމަތިވެދާނެ ކަމުގެ ބިރުވެސް ވަނީ އާންމުވެފައެވެ. އެގޮތުން ކާބޯތަކެތީގެ ކާރިސާގައި ހަތަރު މިލިއަނާ ފަސް މިލިއަނާ ދެމެދު އަދަދެއްގެ މީހުންނަށް އަސަރު ކުރާނެ ކަމަށް އެގައުމުގެ ބޮޑުވަޒީރު ރަނިލް ވިކްރަމަސިންގހަ ވަނީ ވިދާޅުވެފައެވެ.
ބޮޑުވަޒީރުގެ އޮފީހުގައި، ކޮމިޓީ އޮން ފުޑް ސެކިއުރިޓީއާއެކު ކުރިއަށްގެންދިޔަ ބައްދަލުވުމެއްގައި ވާހަކަދައްކަވަމުން ބޮޑުވަޒީރު ވިކްރަމަސިންގހަ ވަނީ، ކާބޯތަކެތީގެ ކާރިސާ ކުރިމަތިވުމުން އެގައުމުގެ ފަސް މިލިއަނެއްހާ މީހުންނަށް އޭގެ ސީދާ އަސަރު ކުރާނެކަމަށް މިހާތަނަށް އަންދާޒާކުރެވިފައި ވީނަމަވެސް، ކާރިސާގައި ރައްޔިތުންނަށް ކުރާ އަސަރު ކުޑަކުރުމަށް މަސައްކަތްކުރާނެކަމަށް ވިދާޅުވެފައެވެ.
އެގޮތުން ބޮޑުވަޒީރު ވިކްރަމަސިންގހަ ވަނީ ކާބޯތަކެތީގެ ކާރިސާއާ ކުރިމަތިލުމަށް ޚާއްސަ ކޮމިޓީއެއް އުފައްދަވައި، މަޖިލިސް މެމްބަރު ނިމަލް ލަންސާގެ ބެލުމުގެ ދަށުން ކޮމިޓީގެ ކަންތައްތައް ކުރިއަށް ގެންދެވުމަށް އަންގަވާފައެވެ. އަދި ކޮމިޓީން މިކަމަށް އެކުލަވާލާ ޕްލޭން ދެ ހަފުތާގެ ތެރޭގައި ނިންމުމަށް ވަނީ އަންގަވާފައެވެ.
ބޮޑުވަޒީރު ވަނީ 225 ޑިވިޝަންގައި ފުޑް ސެކުއިރިޓީ ޕްރޮގްރާމްތައް ހިންގުމަށް މަޖިލީސް މެމްބަރުންނާ ހަވާލުކުރެވޭނެ ކަމަށް ވިދާޅުވެފައެވެ. އަދި ބާކީ ހުރި ސަރަހައްދުތައް، ސަރުކާރުގެ އިސްއޮފިޝަލުންނާއި މިނިސްޓްރީތަކުގެ ސެކްރެޓަރީންނާއި އަދި ޕްރައިވެޓް ސެކްޓަރ މެދުވެރިކޮށް މެނޭޖް ކުރެވޭނެ އިންތިޒާމުތައް ހަމަޖައްސައި، ޖުމުލަ 336 ސަރަހައްދެއްގައި މި ޕްރޮގްރާމް ހިންގޭނެ އިމްތިޒާމް ހަމަޖެއްސުމަށް ވަނީ ވިދާޅުވެފައެވެ.
ބޮޑުވަޒީރު ވިކްރަމަސިންގހަ ވަނީ އެގައުމުގެ ދަނޑުވެރިކަން ޒަމާނީ ފެންވަރަށް ތަރައްގީކޮށް، ސަރަހައްދީ ފެންވަރުގައި މާކެޓުގައި ވާދަވެރިކަމާއެކު ބައިވެރިވުމަށް، މެދުރާސްތާ އަދި ދިގު ރާސްތާ ޕްލޭނެއް ބޭނުންވާކަމަށްވެސް ވިދާޅުވެފައެވެ.
