އަފްޣާނިސްތާނަށް އައި ބިންހެލުމެއްގައި މަރުވި މީހުންގެ އަދަދު 200ން މައްޗަށް އަރައިފިއެވެ.

އަފްޣާނިސްތާނުގެ ދައުލަތުގެ މީޑިއާއާ ޙަވާލާދީ ބޭރުގެ ނޫސްތަކުން ރިޕޯޓުކޮށްފައިވާ ގޮތުގައި ބާރުގަދަ ބިންހެލުމެއް އައިސް 280ށް ވުރެ ގިނަ މީހުން ވަނީ މަރުވެފައެވެ. އަދި އެތައް ބަޔަކު ޒަޚަމްވެފައިވެއެވެ. އެގޮތުން ޒަޚަމްވި މީހުންގެ އަދަދު 600ށް ވުރެ މަތިކަމަށް ނޫސްތަކުން ރިޕޯޓު ކޮށްފައިވެއެވެ.

ބަޚްތާރް ނިއުސް އޭޖެންސީން ރިޕޯޓު ކޮށްފައިވާ ގޮތުގައި މަރުވި މީހުންނާއި ޒަޚަމްވި މީހުންގެ އަދަދު އެއަށްވުރެ މައްޗަށް ދިއުންވެސް އެކަށީގެންވެއެވެ.

ސަރުކާރުގެ ތަރުޖަމާނު ބިލާލް ކަރީމީ ވިދާޅުވެފައިވާ ގޮތުގައި އަފްޣާނިސްތާނުގެ ޕަކްޓިކާ ޕްރޮވިންސުގެ ހަތަރު ޑިސްޓްރިކްޓަކަށް ބިންހެލުމުގެ އަސަރު ވަނީ ކޮށްފައެވެ. އަދި އެތައް އިމާރާތެއް ބިމާ ހަމަވެފައިވާކަމަށް އޭނާ ވިދާޅުވިއެވެ.

އެ ޤައުމުގެ ކަމާބެހޭ ފަރާތްތަކުން ވަނީ މީހުން ސަލާމަތް ކުރުމުގެ ޚާއްސަ އޮޕަރޭޝަނެއް ފަށާފައެވެ.

އެމެރިކާގެ ޖިއޮލޮޖިކަލް ސަރވޭއިން ބުނެފައިވާ ގޮތުގައި މި ބިންހެލުމަކީ 6.1 މެގްނިޓިއުޑްގެ ބިންހެލުމެކެވެ.