ލިވަޕޫލްއަށް ކުޅެމުން އަންނަ ފިލިޕޭ ކުޓީނިއޯ ބާސެލޯނާއަށް ބަދަލުވާން އުޅޭކަމަށް ދެކެވޭ ވާހަކައަށް އޭނާ ރައްދުދީފި އެވެ.

ނޫސްވެރިންނަށް މައުލޫމާތު ދެމުން ކުޓީނިއޯ ބުނީ އޭނާއާ އެކު ލިވަޕޫލް ދިގު އެއްބަސްވުމެއް ހަދާފައިވާ ކަމަށާއި، އެހެން ކްލަބަކަށް ބަދަލުވުމުގެ ވިސްނުމެއް އަދި ނުގެންގުޅޭ ކަމަށެވެ. އެގޮތުން އޭނާ ބުނީ ކުރިޔަށް އޮތް ސީޒަނަށް ތައްޔާރުވަމުން އަންނަ ކަމަށާއި، އެހެން ކަންކަމާމެދު އޭނާ ވިސްނަމުންނުދާ ކަމަށެވެ.

ގިނަ ކްލަބްތަކުން ހޯދުމަށް ޝައުގުވެރިވާ ކުޓީނިއޯ ހޯދުމަށް ބާސާއިން ވަނީ ޖެނުއަރީ ޓްރާންސްފާގައިވެސް މަސައްކަތްކޮށްފައެވެ. އެހެންނަމަވެސް 2022 ވަނަ އަހަރުގެ ނިޔަލަށް ލިވަޕޫލާއެކު އެއްބަސްވުން ހަދާފައިވާ ކުޓީނިއޯ ދޫކޮށްލަން ލިވަޕޫލުން އެފަހަރު އެއްބަހެއް ނުވިއެވެ.

ކުޓީނިއޯ އަދި ލިވަޕޫލްގެ އިތުރު ކުޅުންތެރިޔަކުވެސް ވިއްކާލަން ބޭނުންނުވާ ކަމަށް އެޓީމުގެ ކޯޗު ޔާގަން ކްލޮޕް ވަނީ ދާދި ފަހުން ބުނެފައެވެ. އެގޮތުން އޭނާ ބުނީ ލިވަޕޫލްގައި ތިބީ ހުސް މުހިންމު ކުޅުންތެރިން ކަމަށާއި، އެއްވެސް ކުޅުންތެރިޔަކު ވިއްކާލަން ބޭނުންނުވާ ކަމަށެވެ.

ލިވަޕޫލްގައި މޮޅު ކުޅުމެއް ދައްކަމުން އަންނަ އުމުރުން 24 އަހަރުގެ ކުޓީނިއޯ ވަނީ މި ސީޒަނުގައި އެޓީމަށް ކުޅުނު 36 މެޗުގައި 14 ލަނޑު ކާމިޔާބުކޮށްފައެވެ.

އިޓަލީގެ އިންޓަ މިލާނުން 2012 ވަނަ އަހަރު ލިވަޕޫލަށް ބަދަލުވި ކުޓީނިއޯ ވަނީ އެ ކްލަބަށް މިހާތަށް ކުޅުނު 177 މެޗުގައި 39 ލަނޑު ކާމިޔާބުކޮށްފައެވެ.

ކުޓީނިއޯ ވަނީ ބްރެޒިލް ގައުމީ ޓީމާއެކު 20 އަހަރުން ދަށުގެ ވޯލްޑްކަޕް އަދި 17 އަހަރުން ދަށުގެ ސައުތު އެމެރިކަން ފުޓްބޯލް ޗެމްޕިއަންޝިޕްވެސް ކާމިޔާބުކޮށްފައެވެ. މީގެއިތުރުން އޭނާ ވަނީ ފާއިތުވެ ދިޔަ ދެ ސީޒަނުގައި ލިވަޕޫލްގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.