ގަތަރާއި ގަލްފްގެ ބައެއް ގައުމުތަކާ ދެމެދު އުފެދިފައިވާ ހަމަނުޖެހުންތައް ހައްލު ކުރަން ހުރިހާ ފަރާތަކުން ވާހަކަ ދައްކަން އެމެރިކާ އާއި ރަޝިއާއިން ގޮވާލައިފިއެވެ.
ގަތަރު އެކަހަރި ކުރުމަށް ގަލްފްގެ ތިން ގައުމަކުން އިސްވެ އަޅާފައިވާ ފިޔަވަޅު ތަކުގެ ސަބަބުން މަސްރަހް އިތުރަށް ގޯސްވަމުން ދިއުމާއި ގުޅިގެން އެމެރިކާގެ ޚާރިޖީ ވަޒީރު ރެކްސް ޓިލާސަން އާއި ރަޝިޔާގެ ޚަރިޖީ ވަޒީރު ސަރުގޭ ލަވްރޯވް ވަނީ މައްސަލަ ހައްލު ކުރުމަށް ވާހަކަތައް ފެށުމަށް ގޮވާލައްވާފައެވެ.
ހޮނިހިރު ދުވަހު ރަޝިޔާގެ ޚާރިޖިއްޔާއިން ނެރުނު ބަޔާނެއްގައި ބުނެފައިވަނީ އެމެރިކާ އާއި ރަޝިޔާގެ ޚާރިޖީ ވަޒީރުން މައްސަލަ އާ މެދު ފޯނުން މަޝްވަރާ ކުރެއްވި ކަމަށާއި، އެ މަޝްވަރާގައި ގަލްފްގައި ހިމެނޭ އަރަބި ގައުމުތަކުން ގަތަރާއެކު ބާއްވަމުން ދިޔަ ޑިޕޮލޮމެޓިކް ގުޅުން ކަނޑާލުމުން ކުރިމަވަމުންދާ ނޭދެވޭ އަސަރުތަކާ ބެހޭ ގޮތުން ދެ ލީޑަރުން މަޝްވަރާ ކުރެއްވި ކަމަށެވެ.
ހުސްވި ހަފްތާގެ ހޯމަ ދުވަހު، މިސްރާއި ޔުނައިޓެޑް އެރަބް އެމިރޭޓްސް އާއި ބަހްރޭން އަދި ބައެއް އެހެން ގައުމުތަކުން ކުއްލި ގޮތަކަށް ގަތަރާ ގުޅުން ކަނޑާލީ ގަތަރުން ޓެރަރިޒަމަށް ވާގިވެރިވާ ކަމަށް ތުހުމަތު ކޮށްފައެވެ.
ގަތަރުން ގެންދަނީ މި ތުހުމަތު ތަކަށް އިންކާރު ކުރަމުންނެވެ.
ރަޝިޔާ އާއި އެމެރިކާގެ ޚާރިޖީ ވަޒީރުން ވިދާޅުވެފައިވަނީ ވާހަކަ ދައްކައިގެން މައްސަލަތައް އަވަހަށް ހައްލު ކުރަންޖެހޭ ކަމަށާއި އަދި އެކަމަށް ކުރަންޖެހޭ ކޮންމެ ކަމަކަށް ދެ ގައުމުންވެސް ތައްޔާރަށް ތިބި ކަމަށެވެ.
ގަތަރަށް ދަތި ކުރުމުގެ ގޮތުން ގަލްފްގެ އަރަބި ގައުމުތަކުންވަނީ އެއްގަމާއި، ކަނޑާއި ވައިގެ މަގުތައް ބަންދުކޮށްފައެވެ.
