ބެލޮންޑިއޯ އެވޯޑްގެ ބަހުސް ހުޓާލަން ފްރާންސާއި އާސެނަލްގެ ކުރީގެ ތަރި ތިއަރީ އޮންރީ ގޮވާލައިފިއެވެ. އޮންރީ ބުނީ އެއެވޯޑްގެ ހައްގުވެރިއަކީ އޭނާގެ ގައުމުގެ ފޯވާޑް ބެންޒިމާ ކަމަށެވެ. ޗެމްޕިއަންސްލީގުގެ ތަށި ރެއާލް އުފުލާލުމާއެކު، ދުނިޔޭގެ މޮޅު ކުޅުންތެރިޔާއަށްދޭ ބެލޮންޑިއޯ އެވޯޑް ފްރާންސާއި ރެއާލް މެޑްރިޑްގެ ފޯވާޑް ބެންޒިމާއަށް ކަށަވަރުވެއްޖެކަމަށް އޮންރީއާ ހަވާލާދީ މީޑިޔާތަކުން ވަނީ ރިޕޯރޓްކޮށްފައެވެ.
މުބާރާތް ކާމިޔާބުކުރުމުގެ އިތުރުން ބެންޒިމާ ވަނީ ޗެމްޕިއަންސްލީގުގައި 15 ލަނޑު ޖަހައި، މުބާރާތުގެ އެންމެ ގިނަ ލަނޑު ޖަހައިގެން ރަންބޫޓުވެސް ކަށަވަރުކޮށްފައެވެ. އޭގެ ތެރޭގައި ވަރުގަދަ ދެބާރު ކަމަށްވާ ޕީއެސްޖީއާއި ޗެލްސީ ކޮޅަށް ހެދި ހެޓްރިކް ހިމެނެއެވެ. މިސީޒަންގައި ބެންޒިމާ ވަނީ ރެއާލްއަށް 44 ލަނޑު ޖަހާފައެވެ.
ވޯޓްލާން ތިބި މީހުންނަށް އޮންރީ ބުނީ ބެންޒިމާއަކީ އެވޯޑްގެ ހައްގުވެރިޔާކަމަށާއި, ވޯޓްލުން ނިންމާލުމަށް އެދޭކަމަށެވެ. ފްރާންސްގެ ގައުމީ ކޯޗުވެސް ބުނީ އެވޯޑްގެ ހައްގުވެރިއަކީ ބެންޒިމާ ކަމަށެވެ. 34 އަހަރުގެ ފޯވާޑަށް އެވޯޑް ހައްގުކަމަށް ފުޓްބޯޅައިގެ ގިނަ ތަޖުރިބާކާރުން އަންނަނީ ބުނަމުންނެވެ.
