ދުނިޔޭގައި މިހާރު ހުރި އެންމެ އުމުރުން ދޮށީ މީހާގެ އުފަން ދުވަސް ފާހަގަކޮށްފިއެވެ.

ގިނިސް ވޯލްޑް ރެކޯޑްގައި ދުނިޔޭގައި ހުރި އެންމެ އުމުރުން ދޮށީ މީހާގެ ލަގަބު މިހާރު އޮތީ ވެނެޒުއޭލާގެ ހުއާން ވިސެންޓް ޕެރޭޒް މޯރާ އަތުގައެވެ. މިދިޔަ ހުކުރު ދުވަހު އޭނާއަށް ވަނީ 113 އަހަރު ފުރިފައެވެ. ހުއާންގެ އުމުރުން 113 އަހަރު ވީއިރު އޭނާގެ 41 ކާފަ ދަރިން، 18 މުނިކާފަ ދަރިން އަދި 12 މުނިމުނި ކާފަދަރިން އެބަހުއްޓެވެ.

އުމުރުން ދުވަސްވުމުގެ ސަބަބުން ލޭގެ ޕްރެޝަރު ކުޑަކޮށް މަތިވުމާއި އަޑު އިވުމުގައި ދަތިތަކެއް ހުރި ނަމަވެސް ހުއާންއަކީ ސިއްހަތު ރަނގަޅެވެ. އަދި އެއްވެސް ސިއްހީ ބައްޔަކަށް ހުއާން ބޭސް ބޭނުން ނުކުރާކަމަށްވެސް ރިޕޯޓުތައް ބުނެއެވެ.

ދުނިޔޭގެ އެންމެ ދޮށީ މީހާގެ މަގާމު ހުއާންއަށް ލިބުނީ މީގެ ކުރިން އެންމެ އުމުރުން ދޮށީ މީހާގެ މަގާމުގައި ހުރި ގާސިއާ މިއަހަރު މަރުވުމުންނެވެ. އޭނާ މަރުވީ އުމުރުން 112 އަހަރާއި 341 ދުވަހުގައި މިއަހަރުގެ ޖެނުއަރީ މަހުއެވެ.