ފަރުބަދަމަތީ ރަށެއް ކަމުގައިވާ ޒިންތަމްގެ ޖަލެއްގައި ބަންދުކޮށްފައި ހުރި ލީބިޔާގެ ލީޑަރ މުއައްމަރުލް ގައްޒާފީގެ ދަރިކަލުން ސައިފް އަލް އިސްލާމް ގައްޒާފީ ދޫކޮށްލާފައިވާކަމަށް އެޖަލު ބަލަހައްޓަމުންދިޔަ ހަނގުރާމަވެރި ޖަމާއަތުން ބުނެފިއެވެ.
ލީބިޔާގެ ވެރިރަށް ޓްރިޕޮލީގެ ދެކުނު އިރުމަތީގެ ފަރުބަދަމަތީ ސަރަހައްދުގެ ރަށެއް ކަމުގައިވާ ޒިންތަންގެ މައްޗަށް ވެރިވެގަނެފައިވާ ހަނގުރާމަ މަތީ ގްރޫޕް ކޮމާންޑަރެއް ކަމަށްވާ އަބޫބަކުރު އަލް ސިއްދީގް ބައްޓާލިއަން ނެރެފައިވާ ބަޔާނެއްގައި ބުނެފައިވަނީ ހޮނިހިރު ދުވަހުގެ ވަގުތެއްގައި ސައިފް ދޫކޮށްލާފައިވާ ކަމަށެވެ.
ގައްޒާފީ އެންމެ ލޯބިފުޅުވާ ދަރިފުޅު ކަމުގައިވާ އުމުރުން 44 އަހަރުގެ ސައިފް އަލް އިސްލާމް ހައްޔަރުކޮށްފައިވަނީ އިދިކޮޅު ފަރާތްތަކުން ޓްރިޕޮލީ ހިފިފަހުން 2011 ވަނަ އަހަރުގެ ނޮވެމްބަރ މަހު އޭނާ އަވައްޓެރި ނައިޖަރ އަށް ދަތުރު ކުރަމުންދަނިކޮށެވެ.
