ހުޅަނގުގެ ގައުމުތަކުން އިގުތިސާދީ ފައިދާ ހޯދުމަށް ގައުމުތަކުގެ ސަލާމަތް ވިއްކާނުލުމަށް ނޭޓޯގެ ސެކެރެޓަރީ ޖެނެރަލް ޖެންސް ސްޓޮލްޓެންބަރގް ގޮވާލައްވައިފިއެވެ.

އަންގާރަ ދުވަހު ކުރިއަށްދިޔަ ވޯލްޑް އިކޮނޮމިކް ފޯރަމްގައި ވާހަކަދައްކަވަމުން ސްޓޮލްޓެންބަރގް ވަނީ ގައުމުތަކުން އިގުތިސާދީ ކުރިއެރުން ހޯދަން ނިންމާ ނިންމުންތަކުގެ ސަބަބުން ގައުމުތަކުގެ ސަލާމަތަށް އޭގެ އަސަރު ކުރާކަމަށް ވިދާޅުވެފައެވެ.

ޗައިނާގެ ޓެކްނޮލޮޖީ، 5ޖީ ޓެކްނޮލޮޖީ އާއި ރަޝިއާގެ ގޭހަށް ނޯޑް ސްޓްރީމް 2 ޕައިޕްލައިން ބޭނުންކުރުމާ ގުޅޭގޮތުން ވާހަކަ ދައްކަވަމުން ސްޓޮލްޓެންބަރގް ވަނީ އިގުތިސާދީ ކުރިއެރުން ހޯދަން ނިންމާ ނިންމުންތަކުގެ ސަބަބުން ގައުމުތަކުގެ ސަލާމަތައް އޭގެ އަސަރު ކުރާކަމަށާއި ފްރީ ޓްރޭޑަށްވުރެ ގައުމުގެ މިނިވަންކަން މުހިންމުކަމަށް ވިދާޅުވެފައެވެ. އޭނާ ވަނީ ގައުމުގެ އުސޫލުތަކާއި ހަމަތައް ހިފޭއްޓުން ފައިސާއަށް ވުރެ މުހިންމުކަމަށް ވިދާޅުވެފައެވެ.

ސްޓޮލްޓެންބަރގް ވަނީ ޗައިނާ އާއެކު ވިޔަފާރީގެ މުއާމަލާތްތައް ނުކުރުމަށް ނުބުނާކަމަށާއި އެހެން ނަމަވެސް އެގައުމަށް 5ޖީ ހިދުމަތުގެ ބާރު ދިނުން އެއި ގައުމުތަކުގެ ސަލާމަތަށް އޮތް ނުރައްކަލެއް ކަމަށް ވިދާޅުވެފައެވެ.

ސްޓޮލްޓެންބަރގް ވިދާޅުވީ ފްރީ ޓްރޭޑާއި އިގުތިސާދީ ފައިދާ ހޯދުމަށް ގައުމުގެ ނެޓްވޯލް އިތުބާރު ނުކުރެވޭ ސަޕްލަޔަރުންނަށް ހުޅުވާލުމަކީ ގައުމުގެ ސަލާމަތަށް ނުރައްކަލެއް ކަމަށެވެ.

5ޖީ ނެޓްވޯކް އިން ޗައިނާގެ ޓެކްނޮލޮކީ ބޭރުކުރުމަށް އެމެރިކާއިން ހުޅަނގުގެ ގައުމުތަކަށް ބާރުއަޅަމުންދާތަ ދުވަސްތަކެއް ވެއްޖެއެވެ. އެމެރިކާއިން ގަބޫލުކުރާ ގޮތުގައި ޗައިނާގެ ވާވޭ އެޗްޑަބްލިއުޓީ.ޔޫއެލް އަކީ ޗައިނާގެ ކޮމިއުނިސްޓް ޕާޓީގެ ގްލޯބަލް ސަވެއިލަންސް މެޝިނަރީއެކެވެ.

މީގެ އިތުރުން ސްޓޮލްޓެންބަރގް ވަނީ ފިންލޭންޑް އާއި ސްވިޑްން އިން ނޭޓޯއާ ގުޅުމަށް ތުރުކީއާއެކު ކުރާ މަޝްވަރާތައް ކާމިޔާބުވާނެ ކަމުގެ ޔަގީންކަން އެބައޮތްކަމަށް ވިދާޅުވެފައެވެ. ތުރުކީއާ މަޝްވަރާކުރަން ފިންލޭންޑް އާއި ސްވިޑްންގެ މަބްދޫބުން ބުދަ ދުވަހު ތުރުކީއަށް ދިއުމަށް ހަމަޖެހިފައިވާކަމަށް ފިންލޭންޑްގެ ފޮރިން މިނިސްޓަރު ޕެއްލާ ހާވިސްޓޯ ވަނީ ވިދާޅުވެފައެވެ.