ރެއާލް މެޑްރިޑަށް ކުޅެމުން އަންނަ ސްޕެއިންގެ ފޯވާޑް އަލްވާރާ މޮރާޓާ އާއި މެންޗެސްޓާ ޔުނައިޓެޑާ ދެމެދު އެއްބަސްވުމަކަށް އާދެވިފައިވާ ކަމަށާއި، ސޮއިކުރާނީ އަންނަ ހޯމަ ދުވަހު ކަމަށް ރިޕޯޓްތައް ބުނެފި އެވެ.

ރިޕޯޓްތައް ބުނާގޮތުން މޮރާޓާ ޔުނައިޓެޑަށް ބަދަލުވާން އެއްބަސްވެފައިވަނީ 64 މިލިއަން ޕައުންޑަށް ކަމަށާއި، އެހެންނަމަވެސް ފުރަތަމަ ޔުނައިޓެޑުން ހުށަހެޅީ 60 މިލިއަން ޕައުންޑު ކަމަށެވެ. އެގޮތުން ޔުނައިޓެޑުން ހަތަރު މިލިއަން ޕައުންޑު އިތުރުކުރި ކަމަށްވެސް ރިޕޯޓްތައް ބުނެއެވެ.

މީގެއިތުރުން ރިޕޯޓްތައް ބުނާގޮތުން ހުރިހާ ހަރަދުތަކާއެކު އުމުރުން 24 އަހަރުގެ މޮރާޓާގެ ޓްރާންސްފާ ފީ 73 މިލިއަން ޕައުންޑަށް އަރާނެ ކަމަށާއި، އެގޮތުން އޭނާ ވެގެންދާނީ ސްޕެއިންގެ ތާރީހުގައިވެސް އެންމެ އަގުބޮޑު ކުޅުންތެރިޔާއަށް ކަމަށެވެ.

މޮރާޓާ ހޯދުމަށް ނަން މަޝްހޫރު ކްލަބްތަކުން މަސައްކަތްކުރާއިރު، ރެއާލްގެ ފުރަތަމަ އެގާރައިން ޖާގަ ލިބުން ދަތިވާތީ އޭނާ ރެއާލް ދޫކޮށްލާނެ ކަމަށް ބެލެވެއެވެ.

ރެއާލް މެޑްރިޑް ޔޫތް ޓީމުން ކެރިޔަރު ފެށި މޮރާޓާ އެ ކްލަބްގެ ސީނިއާ ޓީމަށް ކުޅެން ފެށީ 2010 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި ހަތަރު ސީޒަން ހޭދަކޮށް ކުޅުނު 52 މެޗުގައި 11 ލަނޑު ކާމިޔާބުކޮށްފައެވެ.

ރެއާލް ދޫކޮށްލުމަށްފަހު މޮރާޓާ ޔުވަންޓަސް އަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި ދެ ސީޒަން ވަނީ ހޭދަކޮށްފައެވެ. އެގޮތުން އޭނާ ވަނީ އެޓީމަށް ކުޅުނު 93 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލް އަށް ބަދަލުވީ މި ސީޒަނުގައެވެ. އެގޮތުން އޭނާ ވަނީ މިވީތަނަށް މި ސީޒަނުގައި އެޓީމަށް ކުޅުނު 43 މެޗުގައި 20 ލަނޑު ކާމިޔާބުކޮށްފައެވެ.