އިނގިރޭސި ވިލާތުގައި ބުރާސްފަތި ދުވަހު ބޭއްވުނު އިންތިޚާބުގައި ބޮޑު ވަޒީރު ތެރީސާ މޭ އަށް ގާނޫނު ހަދާ މަޖިލީހުގައި އޮތް އަގްލަބިއްޔަތު ގެއްލުނަސް އިނިގިރޭސި ވިލާތް ޔޫރަޕިއަން ޔޫނިއަން (އީޔޫ) އިން ވަކިވުމުގެ މަޝްވަރާތައް ތާވަލުކުރެވިފައިވާ ތާރީޚަށް ބޭއްވުމަށް ހުރަސްތަކެއް ނެތް ކަމަށް ޖަރުމަނުގެ ޗާންސެލާ އެންގެލާ މާކެލް ވިދާޅުވެއްޖެއެވެ.

ޗާންސެލާ މާކެލް ވިދާޅުވީ އެކަަމަނާ ގަބޫލުފުޅު ކުރައްވަނީ އިނގިރޭސި ވިލާތް ތާވާލު ކުރެވިފައިވާ ތާރީޚަށް ކަންކަން ގެންދާނެ ކަމަށް ކަމަށާއި އަދި އީޔޫ އޮތީ "ތައްުޔާރަށް" ކަމަށެވެ. އީޔޫ އިން ވަކކިވުމުގެ މަޝްވަރާތައް 19 ޖޫންގައި ފެށުމަށް ތާވަލު ކުރެވިފައިވާއިރު މިއީ ބޮޑު ވަޒީރު ތެރީސާ މޭ އަށް އާންމު އިންތިޚާބުގައި ލިބިވަޑައިގެންނެވި ނާކާމިޔާބަށް ފަހު ޗާންސެލާ މާކެލްގެ ފުރަތަމަ ވާހަކަފުޅެވެ.

ހުކުރު ދުވަހު މެކްސިކޯ ސިޓީގައި ހުންނަވާ ޗާންސެލާ މާކެލް ވިދާޅުވި އީޔޫ އިން ވަކިވިޔަސް އިނގިރޭސި ވިލާތް ރަނގަޅު ބައިވެރިއެއްގެ ގޮތުގައި ދެމި އޮންނާެނެ ކަމަށް އުއްމީދު ކުރައްވާ ކަމަށާއި، އީޔޫގައި އިނގިރޭސި ވިލާތް ނެތަސް އެއީ ޔޫރަޕަށް ނިސްބަތްވާ ގައުމެއް ކަމަށެވެ.

ބޮޑު ވަޒީރު ތެރީސާ މޭގެ ކޮންޒާވެޓިވް ޕާޓީއަށް ގާނޫނު ހަދާ މަޖިލީހުގައި ސާފު އަގްލަބިއްޔަތު ގެއްލިފައިވާއިރު، އެކަަމަނާ މެޖޯރިޓީ ހޯއްދެވުމަށް އަށް މެމްބަރުން ބޭނުންވެއެވެ. ނާކާމިޔާބީ އާއި ގުޅިގެން އީޔޫ އިން ވަކިވުމުގެ މަޝްވަރާތަކަށް ހުރަސްއެޅިދާނެ ކަމަށް ބެލެވޭއިރު، ބޮޑު ވަޒީރު މޭ އަވަސް އިންތިޚާބަކަށް ގޮވާލެއްވީ އީޔޫ އިން އިނގިރޭސިވިލާތް ވަކިވުމުގެ މަޝްވަރާތައް އަވަސްކުރެއްވުމަށް ގާނޫނު ހަދާ މަޖިލީހުގައި އެކަމަނާގެ ސަރުކާރުގެ ބާރު އިތުރަށް ވަރުގަދަ ކުރެއްވުމުގެ ބޭނުންފުޅުގައެވެ. ނަމަވެސް އިންތިޚާބުގެ ނަތީޖާ މި ވަނީ ދިމާ އިދިކޮޅަށް ނުކުމެފައެވެ. ބޯޑު ވަޒީރު މޭ ވިދާޅުވެފައި ވަނީ އެކަމަނާ އާ ސަރުކާރެއް އެކުލަވާލައްވާނެ ކަމަށާއި، އެކަން ކުރައްވާނީ އިންތިޚާބުގައި 10 ގޮނޑި ލިބުނު ޑިމޮކްރެޓިކް ޔޫނިއަނިސްޓް ޕާޓީ (ޑީޔޫޕީ) އާއި އެކުގައި ކަމަށެވެ.

ބުރާސްފަތި ދުވަހު ބޭއްވުނު އިންތިޚާބުގައި ކޮންޒާވެޓިވް ޕާޓީ އަށް ލިބުނީ 318 ގޮނޑި އެވެ. އިދި ކޮޅު އެންމެ ބޮޑު ޕާޓީ،  ލޭބާ ޕާޓީއަށް ލިބުނީ 262 ކެވެ.