ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަކީ އަމިއްލަ އެދުން ބޮޑު ކުޅުންތެރިއެއް ނޫން ކަމަށް އެ ކްލަބަށް ކުޅެމުން އަންނަ ފްރާންސްގެ ފޯވާޑް ކަރިމް ބެންޒެމާ ބުނެފި އެވެ.
އޭއެސް އަށް ދިން އިންޓަވިއުއެއްގައި ބެންޒެމާ ބުނީ ރޮނާލްޑޯ އަކީ ދަނޑު މަތީގައި އަމިއްލަ އެދުންބޮޑު ކުޅުންތެރިޔެއް ނޫން ކަމަށާއި، އޭނާ ގެންނަ ބައެއް ބަދަލުތަކަކީ ހައިރާންކުރެވިނިވި ބަދަލުތަކެއް ކަމަށެވެ. އެގޮތުން އެކަކު އަނެކަކު ދެނެގަންނަން ވެސް ފަސޭ ހަކަމަށް އޭނާ ވަނީ ބުނެފައެވެ.
ރެއާލްގެ ކޯޗު ޒައިނުއްދީން ޒިދާންއާ ބެހޭގޮތުން ބެންޒެމާ ބުނީ އޭނާއަކީ ވަރަށް ފާހަގަކޮށްލެވޭ ކޯޗެއް ކަމަށާއި، މެޗު ތެރެއިން ގެންނަ ބައެއް ބަދަލުތަކަކީ އަޖައިބުވާ ފަދަ ބަދަލުތަކެއް ކަމަށެވެ.
މީގެ އިތުރުން ބެންޒެމާ ބުނީ ޓީމެއް ގޮތަށް މަސައްކަތްކޮށްފި ނަމަ ރެއާލްއަކީ މޮޅުވާ ޓީމެއް ކަމަށާއި، އެގޮތުން އެ މޮޅުވާ އިރު ރެއާލް ހުއްޓުވުމަކީ އެއްވެސް ޓީމަކަށް ވާނެ ކަމެއް ނޫން ކަމަށެވެ.
މި ސީޒަނުގައި ރެއާލް ވަނީ ސްޕެނިޝް ލީގުގެ ތަށި އުފުލާލުމުގެ އިތުރުން ޗެމްޕިއަންސް ލީގުގެ ތަށި ވެސް އުފުލާލާފައެވެ. މި ސީޒަނުގައި ރެއާލް އަށް ނުލިބުނީ ހަމައެކަނި ކޮޕާޑެލްރޭ މުބާރާތެވެ. އެ މުބާރާތް ކާމިޔާބުކުރީ ބާސެލޯނާއެވެ.
