އެމެރިކާގެ 41 ވަނަ ރައީސް ޖޯޖް އެޗް ޑަބްލިއު ބުޝްގެ އަނބިކަނބަލުން, ފަސްޓްލޭޑީ ބާބަރާ ބުޝް އަށް ބުރާސްފަތިދުވަހު 92 އަހަރުފުޅު ފުރިއްޖެއެވެ.
އެކަމާ ގުޅިގެން ވަރަށް ކުލަގަދަކޮށް އެކަން ވަނީ ފާހަގަކުރައްވައިފިއެވެ. ބާބަރާއަކީ އެމެރިކާގެ 43 ވަނަ ރައީސް ޖޯޖް ޑަބްލިއު ބުޝްގެ ވެސް މަންމާފުޅެވެ. ރައީސް ޖޯޖް އެޗް ޑަބްލިއު ބުޝް އެކަމަނާގެ އުފަންދުވަހުގައި ކުރެއްވި ޓްވީޓުގައި ވިދާޅުވެފައިވަނީ ބާބަރާއަށް އެންމެ އުފާވެރި އުފަންދުވަހަކަށް އެދިލައްވާ ކަމަށާއި އެމަނިކުފާނަކީ އަދިވެސް ދުނިޔޭގައި ހުންނެވި އެންމެ ނަސީބުގަދަ ބޭފުޅާ ކަމަށެވެ."
Happiest of birthdays to Barbara Pierce of Rye, NY. I'm still the luckiest guy in the world. pic.twitter.com/qsUHtyBIez
— George Bush (@GeorgeHWBush) June 8, 2017
ބުޝް އާއިލާގެ ސްޕޯކްސްޕާސަން ވިދާޅުވެފައި ވަނީ ބާބަރާގެ އުފަންދުވަސް ވަރަށް ކުލަގަދަކޮށް ފާހަގަ ކުރައްވާފައިވާ ކަމަށާއި ދައުވަތު ދެއްވާފައިވަނީ އާއިލާގެ ބޭފުޅުންނަށް ކަމަށެވެ.
ބާބަރާ އާއި ރައީސް ޖޯޖް ބުޝް އަށް ލިބިވަޑައިގެންފައި ވަނީ ހަ ބޭފުޅުންނެވެ. އޭގެ ތެރޭގައި އެމެރިކާގެ ކުރީގެ ރައީސް ޖޯޖް ޑަބްލިޔު ބުޝް އާއި ޖެބް ބުޝް އާއި މާވީން ބުޝް ހިމެނިވަޑައިގަންނަވައެވެ.
ބާބަރާއާއި ޖޯޖް ބުޝްއަކީ އެމެރިކާގެ ތާރީޚުގައި މިހާތަނަށް އެންމެ ގިނަ ދުވަހު ކައިވެނި ބައްލަވައިގެން ތިއްބެވި ރައީސުންގެ މަގާމު ލިބިލައްވާފައިވާ ދެބޭފުޅުންނެވެ. އެ ދެ ބޭފުޅުންގެ ކައިވެންޏަށް 72 އަހަރު ވަނީ ފުރިފައެވެ. އެކަން މިއަހަރު ޖެނުއަރީގައި ވަނީ ފާހަގަކުރައްވާފައެވެ. ދެބޭފުޅުން ކައިވެނި ބައްލަވައިގެންފައި ވަނީ ޖެނުއަރީ 6، 1946 ވަނަ އަހަރުއެވެ. ކައިވެނި ބައްލަވާފައިވަނީ ބާބަރާގެ އުމުރުފުޅުން 19 އަހަރުގައި އަދި ޖޯޖް ބުޝްގެ އުމުރުފުޅުން 20 ގައެވެ.
ބާބަރާ ބުޝްއަށް 92 އަހަރުފުޅު ފުރުނުއިރު ރައީސް ޖޯޖް އެޗް ޑަބްލިއު ބުޝް އަށް 93 އަހަރުފުޅު ފުރޭނީ މި އަންނަ ހޯމަދުވަހުއެވެ. އެއީ ޖޫން މަހުގެ 12 ވަނަ ދުވަހެވެ.
