ސީލައިފް މޯލްޑިވްސް ޕްރައިވެޓް ލިމިޓެޑްގެ ވެރިޔާ ވ. ތިނަދޫ، ރެޑްހައުސް، އަހުމަދު މޫސާ މުހައްމަދު (އައްމަޓީ)ގެ މައްސަލައިގައި ކޯޓުން ވަކި ގޮތަކަށް ނިންމުމުގެ ކުރިން އެކަމާ ގުޅޭގޮތުން ޚިޔާލުފާޅުކޮށް ނުހެދުމަށް ސްޕްރީމް ކޯޓުން ޕީޖީ ހުސައިން ޝަމީމަށް އަންގަވައިފިއެވެ.
ޝަރީޢަތުގައި ހިނގަމުންދާ މައްސަލައެއްގައި ވަކިގޮތަކަށް އަމަލު ނުކުރުމަށް ސްޕްރީމް ކޯޓުން އަމުރުނެރެފައި މިވަނީ ހޯމަ ދުވަހު ކުރިޔަށްދިޔަ މިމައްސަލައިގެ އަޑުއެހުމުގައި އައްމަޓީގެ ވަކީލު މަރިޔަމް ނިހާޔަތު ހާމަ ކުރެއްވި ކަންތައްތަކަކާ ގުޅިގެންނެވެ.
ނިހާޔަތު ވަނީ ރަސްމީ ޙައިސިއްޔަތުން ބޭރުން މި މައްސަލައާއި ގުޅިގެން ބްލޮގް ލިޔުއްވާކަމާއި، މި މައްސަލައަށް ނުފޫޒު ފޯރުވޭފަދަ މޭރުމަކުން އަމަލުތަކެއް ހިނގާފައިވާކަމަށް ވިދާޅުވެފައެވެ. އެގޮތުން ކޯޓުން ނިންމާ ނިންމުންތަކާއި ގުޅިގެން ފަނޑިޔާރުންގެ ޒާތަށް ނިސްބަތްކޮށް ވާހަކަދެއްކުމާއި، ޕީޖީ ބޭނުންފުޅުވާ ގޮތަކަށް ނޫން ގޮތަކަށް އަމުރެއް ނުނެރެވޭނެ ފަދަ މޭރުމަކުން އަމަލުތައް ބަހައްޓަވާފައިވާކަމަށް ނިހާޔަތު ފާހަގަ ކުރެއްވިއެވެ.
އިސްތިއުނާފީ ނުކުތާތަކަށް ޖަވާބުދެއްވުމުގެ ކުރިން އެފަރާތުން ހުށައަޅާފައިވާ ހުށައެޅުމަކާއި ގުޅޭގޮތުން ވާހަކަދައްކަވަން ބޭނުންވާކަން ފާހަގަކުރައްވާ ފަނޑިޔާރެއްގެ ކުރިފުޅުމައްޗަށް ހުށައެޅިފައިވާ ކަމަކާމެދު ބޭރުގައި ވާހަކަދެއްކުމާއި، ނުފޫޒެއް ފޯރުވިދާނެ ގޮތަކަށް އަމަލުކުރުން ފަދަ ކަންކަމަކީ ޝަރުއީ ނިޒާމުގެ މުޤައްދަސްކަން ގެއްލޭ ކަންކަންކަމަށް ވިދާޅުވަމުން، އިންސާފުން ޝަރީއަތް ކުރެވުމަކީ ކޮންމެ މީހަކަށްވެސް ލިބިގެންވާ ޙައްޤެއްކަމަށް އޭނާ ވިދާޅުވިއެވެ.
އެކަމާއި ގުޅިގެން ސްޕްރީމް ކޯޓުން ނެރުނު އަމުރުގައި ބުނެފައިވަނީ ޖިނާޢީ ކުށެއް ކުރިކަމުގެ ދައުވާ އެމީހެއްގެ މައްޗަށް އުފުލިފައިވާ ކޮންމެ ފަރާތަކީ ކޯޓުން އެމީހެއްގެ މައްޗަށް ކުށް ސާބިތުވުމުގެ ކުރިން ކުށެއް ނެތް މީހެއްކަމުގައި ބެލުމުގެ ހައްގު ލިބިގެންވާ މީހެއްކަމުގައިވާތީ ކޯޓުން އެކަމަކާ ގުޅޭގޮތުން ވަކިގޮތެއް ނިންމުމުގެ ކުރިން ޤާނޫނު އަސާސީގައި ބަޔާންވެގެންވާ ހައްގަށް އެއްވެސް އަސަރެއް ކުރާނޭ މޭރުމަކުން ގާނޫނު އަސާސީގެ އެންމެހައި ހަމަތަކާއި، ގާނޫނާއި، އެންމެހައި ފަރުދުންގެ ހައްގުތަކާއި މިނިވަންކަން ނެގެހެއްޓުމުގެ ޒިންމާ ގާނޫނު އަސާސީން މަތިކޮށްފައިވާ އެއްވެސް ފަރާތަކުން ޚިޔާލުފާޅުކޮށް ނުހެދުމަށް އަމުރުކޮށް، މިފަދަ ކޮންމެ ކަމަކީ ކޯޓުގެ ހުރުމަތް ކެނޑުންކަމުގައި ބެލެވިދާނެ އަމަލެއްކަމުގައި ދަންނަވާކަމަށް ވިދާޅުވެފައެވެ.
ހޯމަ ދުވަހުގެ އަޑުއެހުމުގައި ކްރިމިނަލް ކޯޓުގައި މައްސަލަ ބެއްލެވި ގާޒީއަށް ތުހުމަތުތަކެއް ކުރެވޭ ބީދައިން ދައުލަތުގެ ވަކީލު ހައިކޯޓުގައި ވާހަކަ ދައްކަވާފައިވާކަމަށްވެސް ނިހާޔަތު ވިދާޅުވިއެވެ. އަދި އެގާޒީ އާއި ގުޅޭގޮތުން ޕީޖީ ކުރައްވާފައިވާ ޓްވީޓެއްވެސް ނިހާޔަތު ވަނީ ސުޕްރީމް ކޯޓުގެ ފަނޑިޔާރުންގެ ސަމާލުކަމަށް ގެންނަވާފައެވެ.
ޕީޖީގެ ޓްވީޓުގެ ސަބަބުން ނޫސްތަކުން އެ ޚަބަރު ގެންނަން ޖެހުނުކަމަށްވެސް ނިހާޔާތު ވިދާޅުވިއެވެ. އެކަންކަމުގެ ސަބަބުން އަދުލުވެރި ޝަރީއަތެއް ކުރިއަށް ގެންދިޔުމަށް ހުރަސްތަކެއް ކުރިމަތިވެފައިވާކަމަށް އޭނާ ވިދާޅުވިއެވެ.
ހައިކޯޓުގެ މަރުޙަލާގައިވެސް ޕްރޮސެކިއުޝަންގެ ފަރާތުން ފެނިފައިވަނީ ހަމަ އެފަދަ އަމަލުތަކެއްކަން ނިހާޔަތު ފާހަގަކުރެއްވިއެވެ. ހައިކޯޓުގެ ނިންމުމާއި ގުޅިގެންވެސް ޕީޖީ ޓްވީޓެއް ކުރެއްވިކަމަށް ނިހާޔަތު ވިދާޅުވިއެވެ.
ނިހާޔަތު އެ ވިދާޅުވާ ޓްވީޓަކީ ހައިކޯޓުގެ ނިންމުން ރަނގަޅު ނޫންކަމަށް ބަޔާން ކުރައްވައި، އެ ނިންމުން އިސްތިއުނާފު ކުރައްވާނެކަމަށް ވިދާޅުވެ ޝަމީމް ކުރެއްވި ޓްވީޓްއެކެވެ. ނިހާޔަތު ވަނީ އެ ޓްވީޓަށްފަހު ޝަމީމްގެ ބްލޮގްގައި އަނެއްކާވެސް މި މައްސަލައާއި ގުޅޭގޮތުން ލިޔުއްވާފައިވާކަމަށް ވިދާޅުވެ، އެކަމުގެ ސަބަބުން ޚަބަރުފަތުރާ ވަސީލަތްތަކުން އަނެއްކާވެސް އެ ވާހަކަތައް ދެއްކުމަށް މަގުފަހިވެގެން ދިޔަ ކަމަށް ވިދާޅުވެފައެވެ.
ނިހާޔަތު ވަނީ ޝަމީމްގެ ބްލޮގްގައި ލިޔުއްވާފައިވާ އިބާރަތްތައް ޝަރީއަތުގައި ވިދާޅުވެފައެވެ.
މައިގަނޑު ގޮތެއްގައި އައްމަޓީގެ ވަކީލުންގެ ފަރާތުން ވަނީ އެކަންކަން ހުއްޓުވައިދިނުމަށް އެދި ޕްރޮސެކިއުޝަންގެ މައްޗަށް އަމުރެއް ނެރެދެއްވުމަށް އެދިލައްވާފައެވެ.
އެކަންކަމާއި ގުޅޭގޮތުން ދައުލަތުގެ ވަކީލު ވިދާޅުވީ، މި މައްސަލައަށް ނުފޫޒެއް ފޯރުވުމަށް ޕްރޮސެކިއުޝަނުން މަސައްކަތް ކޮށްފައިނުވާނެ ކަމަށެވެ. ވަކި މީހަކާއި ގުޅޭގޮތުން މައްސަލައެއް އޮތްނަމަ، އެއީ އެ މައްސަލައެއް ހުށައެޅި ވާހަކަ ދެކެވިގެން ގޮތެއް ނިންމެންޖެހޭ ކަމެއްކަން ފާހަގަކުރައްވައި ވަކީލު ވިދާޅުވީ، ދައުލަތުން ރަސްމީ ޙައިސިއްޔަތުން އެފަދަ އެއްވެސް އަމަލެއް ކޮށްފައިނުވާނެ ކަމަށެވެ.
