މުސްލިމުން އަމިއްލަ އުފަންދުވަސް ނުވަތަ ގާތް މީހެއްގެ އުފަންދުވަސްފަދަ އުފާވެރި މުނާސަބަތުތައް ފާހަގަކުރުމުގައި ގޯހެއް ނެތްކަމަށް ސައޫދީގެ އިލްމުވެރިއަކު ވިދާޅުވެއްޖެއެވެ.
ސައޫދީއަރަބިއްޔާގެ ކައުންސިލް އޮފް ސީނިއަރ ސްކޮލަރސްގެ ކުރީގެ މެމްބަރެއްކަމަށްވާ ޑރ. ގައިސް ބިން މުހައްމަދު އައްޝައިޚް މުބާރަކް ވިދާޅުވިކަމަށް ސައޫދީ ގެޒެޓްގައި ރިޕޯޓް ކޮށްފައިވަނީ, އެނިވަރސަރީތަކާއި ގްރެޖުއޭޝަން ފަދަ ކާމިޔާބީތައް މުސްލިމުން ފާހަގަކުރުމަކީވެސް މައްސަލަ އެއް އޮތްކަމެއް ނޫންކަމަށެވެ. މިފަދަ ކަންކަމަކީ އެބައެއްގެ ސަގާފަތާ އާދަކާދަޔާ ގުޅިފައިވާ ކަންތައް ކަމަށާއި، އެފަދަ ކަންކަން، ކީރިތި ގުރުއާނުން ނުވަތަ ރަސޫލާ ﷺގެ ހަދީސްފުޅުތަކުން މަނާކުރެވިފައިވާ ކަންތަކުގެތެރޭގައި ނުހިމެނޭކަމަށެވެ.
ނަމަވެސް އޭނާވަނީ މިފަދަ މުނާސަބަތުތައް ފާހަގަ ކުރުމުގެ ތެރެއިން، ދީނީ ގޮތުން އަދާކުރަންޖެހޭ އަޅުކަމަކަށް ބަދަލުގެނެސް އެފަދަކަމެއް ކޮށްގެންނުވާނެކަމަށް ވިދާޅުވެފަައެވެ. މީގެތެރޭގައި ފަރުޟުކުރެއްވި އަޅުކަންތަކަށް ބަދަލު ގެނައުން (މިސާލަކަށް: ފަރުޟު 5 ނަމާދުގެ އިތުރަށް 6 ވަނަ ނަމާދެއް އުފައްދައިގެން ކުރުން) ފަދަ ކަންކަން ކޮށްގެން ނުވާނެ ކަމަށް ވިދާޅުވެފައެވެ. އެފަދަ ކަންކަން ރަސޫލާ ﷺ ވަނީ ނަހީކުރައްވާފައެވެ.
ނަމަވެސް ރަސޫލާ ﷺ ހިޖުރަކުރެއްވި މުނާސަބަތުފަދަ ކަންކަން ފާހަގަކުރުމަކީ, އެފަދަކަންކަމުގެ ހަނދާން އާކޮށްދީ އީމާންތެރިކަން ގަދަކޮށްދޭނެ ކަމެއް ކަމުގައި ވިދާޅުވާކަމަށް ސައޫދީ ގެޒެޓްގައި ރިޕޯޓްކޮށްފައިވެއެވެ.
