ކުރިއަށް އޮތް މަސްތަކުގެ ތެރޭގައި ފިންލޭންޑާއި ސްވެޑެން ނޭޓޯއާ ގުޅޭނެކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.
އެމެރިކާގެ އޮފިޝަލުންނާ ހަވާލާދީ ބައެއް މީޑިއާތަކުގައި މިހެން ރިޕޯޓުކޮށްފައިވާއިރު، މިދެގައުމުން ނޭޓޯއާ ގުޅިއްޖެނަމަ ނޭޓޯގެ މެމްބަރު ގައުމުތަކުގެ އަދަދު 32ށް އަރާނެއެވެ.
އެމެރިކާގެ އޮފިޝަލާ ހަވާލާދީ މީޑިއާތަކުގައި ރިޕޯޓުކޮށްފައިވާގޮތުން, މިދެގައުމުން ނޭޓޯއާ ގުޅުމުގެ މަޝްވަރާތައް ގައުމުތަކުގެ އިސްވެރިން ދަނީ ކުރަމުންނެވެ.
ޔޫކްރެއިން-ރަޝިޔާ ހަނގުރާމައާއެކު ފިންލޭންޑާއި ސްވެޑެންއިން ވަނީ ނޭޓޯއާ ގުޅޭނީތޯ ނުވަތަ ނޫންތޯ ދެނެގަތުމަށް އެގައުމުތަކުގެ ގާނޫނުހަދާ މަޖިލީހުގައިވެސް އެކަމުގެ މަޝްވަރާތައް ކުރިއަށް ގެންގޮސްފައެވެ. އަދި ދެގައުމުގެ އާންމު ރައްޔިތުންގެ ޚިޔާލުވެސް ހުރީ ނޭޓޯއާ ގުޅުމަށްކަމަށް ރިޕޯޓުތަކުން ދައްކައެވެ.
ދެގައުމުން ނޭޓޯއާ ގުޅުމުގެ މަސައްކަތްތައް ކުރިއަށްދާކަން ފެންމަތިވުމާއެކު ރަޝިޔާއިން ވަނީ މި ދެގައުމުން ނޭޓޯއާ ގުޅުނަސް ޔޫރަޕަށް ހަމަޖެހުން ނުލިބޭނެކަމަށް ބުނެފައެވެ.
އެގޮތުން ނޭޓޯގެ ގައުމުތައް ރަޝިޔާގެ ބޯޑަރު ކައިރިއަށް ނުގެނައުމަށް އެގައުމުން ތަކުރާރުކޮށް ބުނަމުންދާ ކަމަށާއި, ނޭޓޯއާ އެ ދެގައުމުން ގުޅުން އެއީ ޔޫރަޕުގެ ސުލްހަޔަށް އޮތް ހައްލު ނޫންކަމަށް ވަނީ ބުނެފައެވެ.
