މައިލޯ އެފްއޭއެމް ވެޓަރަންސް ލީގު 2022 ގައި ހުޅުމާލެ ވެޓަރެންސް ކުޅުނު ދެވަނަ މެޗު ބޮޑު ތަފާތަކުން ކާމިޔާބުކޮށްފިއެވެ.

މި މެޗުގައި ބައްދަލުކުރީ ކްލަބް އީގަލްސް އާއި ހުޅުމާލެ ވެޓަރެންސްއެވެ. މިއީ ހުޅުމާލެ ވެޓެރަންސް ކުޅުނު ދެވަނަ މެޗެވެ. މި މެޗު އެޓީމުން ކާމިޔާބު ކުރީ 5-0 ންނެވެ. މުބާރާތުގެ ފުރަތަމަ މެޗުގައި ހުޅުމާލެ ވެޓަރެންސް، ކްލަބް ގްރީން ސްޓްރީޓްސް ބަލިކުރީ 2-0 ންނެވެ. މިއާއެކު ހުޅުމާލެ ވެޓަރެންސް ވަނީ ތާވަލުގެ އެއްވަނައަށް ޖެހިލާފައެވެ.

އީގަލްސް އާއި ހުޅުމާލެ ވެޓަރެންސް ބައްދަލުކުރި މެޗުގެ ފުރަތަމަ ހާފު ނިމުނީ 2-0 ންނެވެ. ދެލަނޑުވެސް އެޓީމަށް ކާމިޔާބު ކޮށްދިނީ ކުރިން ގައުމީ ޓީމަށްވެސް ކުޅުނު އިސްމާއިލް މުހައްމަދު (އިއްސޭ) އެވެ. ދެވަނަ ހާފުގައި އީގަލްސް ކުޅުން ރަނގަޅު ކުރި ނަމަވެސް ލަނޑެއް ޖެހޭގޮތެއް ނުވިއެވެ. ދެވަނަ ހާފުގައި ހުޅުމާލެ ވެޓަރެންސްގެ ލަނޑުތައް ޖަހައިދިނީ މުހައްމަދު ޒިޔާދު އާއި އަހުމަދު ޝާހިދުއެވެ. މީގެ ތެރެއިން ދެލަނޑު ޖެހީ ޝާހިދުއެވެ. މެޗުގެ މޮޅު ކުޅުންތެރިއަކަށްވެސް ހޮވުނީ ޝާހިދުއެވެ.

މި މުބާރާތް އަލުން ބާއްވަން ފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. އެފްއޭއެމްއާއި ގުޅިގެން މި ފަހަރުގެ މުބާރާތް .އިންތިޒާމް ކުރަނީ ކްލަބް އިވެންޓްސް އިންނެވެ. 40 އަހަރުން މަތީގެ ކުޅުންތެރިންނަށް ޚާއްޞަކޮށްފައިވާ މުބާރާތުގައި ވާދަކުރަނީ 7 ޓީމެވެ. 40 އަހަރުން މަތީގެ ކުޅުންތެރިންނަށް ޚާއްޞަކޮށްފައިވާ މުބާރާތެއް ނަމަވެސް ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުޞަތު ލިބެއެވެ.

މުބާރާތުގައި މާދަމާ ހަވީރު ކުޅޭ މެޗުގައި ދަ ގްރާންޑޭ ނިކުންނާނީ ޕޮލިސް ކްލަބާއި ދެކޮޅަށެވެ. މެޗު ފަށާނީ 16:30 ގައެވެ. މުބާރާތުގެ މެޗުތައް އޮންނާނީ އެފްއޭއެމްގެ އެއް ނަންބަރު ޓަރފު ދަނޑުގައެވެ.