ޕާކިސްތާންގެ ބޮޑުވަޒީރު އިމްރާން ޚާންގެ އިތުބާރު އޮތްތޯ ބެލުމަށް މިއަދު ގާނޫނު ހަދާ މަޖިލީހުގައި ނަގަން އޮތް ވޯޓު ނުނަގާ ގޮތަށް ނިންމައިފިއެވެ. މަޖިލީހުގެ ޑެޕިއުޓީ ސްޕީކަރު ނިންމަވާފައި ވަނީ މިއީ ގާނޫނީ ގޮތުން ނެގޭނެ ވޯޓެއް ނޫން ކަމަށެވެ. އަދި ވޯޓު ނެގުމަށް އޭނާ އިންކާރު ކުރެއްވިއެވެ. އެއާއެކު ވޯޓުވަނީ ކެންސަލްވެފައެވެ.
މިއައި ބަދަލާއެކު އިމްރާން ޚާން ވަނީ ޕާލަމަންޓް އުވާލާ އައު އިންތިޚާންބެއް ބޭއްވުމަށް ރައީސްގެ ކިބައިން އެދިވަޑައިގެންފައެވެ. އިމްރާން ޚާން ވިދާޅުވާ ގޮތުގައި އޭނާއާއި ދެކޮޅަށް ހިންގޭ ހަރަކާތަކީ ބޭރުގެ ނުފޫޒުން، ޚާއްސަކޮށް އެމެރިކާގެ ނުފޫޒުން ހިންގޭ ހަރަކާތެކެވެ. މިގޮތުން ދާދި ފަހުން ރަޝިޔާއަށް އޭނާ ދަތުރު ކުރައްވާ ރައީސް ޕުޓިންއާއި ބައްދަލުކުރައްވާފައިވާތީ އެމެރިކާއިން އެކަމާއި ރުޅިއައިސްފައިވާ ކަމަށް އިމްރާން ޚާން ވިދާޅުވިއެވެ.
އާދީއްތަ ދުވަހު ބާއްވަން އުޅުނު އިތުބާތު ނެތްކަމުގެ ވޯޓު އޭނާއަށް ކާމިޔާބު ނުކުރެއްވޭނެ ކަމަށް ގިނަބަޔަކު އައީ ގަބޫލު ކުރަމުންނެވެ. ސަބަބަކީ އަސްކަރިއްޔާގެ ތާއީދުވެސް މިހާރު އޭނާއަށް ނެތުމުން ކަމަށް ނިއުސް ރިޕޯޓްތައް ބުނެއެވެ.
